Hanig ni Gwen sa CICC

Bisan unsaon og paningkamot ni Gobernador Gwendolyn Garcia pag-divert sa isyu nga pagpa-imbestigar kaniya mahitungod sa overpricing sa Cebu International Convention Center (CICC), miduol hinuon og samot ngadto kaniya ang demalas.

Hapit tanang mata atua na mapunting ni Gwen human naghiusa ang pipila ka mga militanteng pundok pagbarug uban sa negosyanteng si Crisologo Saavedra, tungod sa ilang kaluoy ni acting Ombudsman for the Visayas Virginia Palanca-Santiago.

Ang kiha nga giatubang ni Palanca-Santiago usa ka matang sa stratehiya nga gihanig sa mga Garcia aron dili kaayo dako ang bun-og nga ilang maangkon sa higayon nga sagpaon na sila og mga ebidensiya may labot sa katukoran nianang kontrobersiyal nga CICC.

Apan bisan unsaon pa niya og pangugat, mura’g atua gyud magpaingon kaniya ang demalas.

Ngano man? Tungod kay walay laing ahensiya sa kagamhanan nga nalambigit pagpatukod nianang CICC. Brainchild kana ni Gwen.

Kun ikomparar sa isyu sa lampposts, mas makalingkawas pa si Mayor Thadeo Ouano sa Mandaue ug Mayor Arturo Radaza sa LapuLapu sa kaso nga ilang giatubang tungod kay si kanhi DPWH Sec. Hermogenes Ebdane, nga karon mao na ang kalihim sa depensa, ang adunay dakong papel sa pagpamalit nianang mga lampposts.

Dili nato maingon nga walay sala silang Ouano ug Radaza ug sa mga opisyal sa Department of Public Works and Highways tungod kay dili mahimong mopirma lang sila nga dili magtan-aw sa mga "circumstances" ug sa mahitabo kanila sa higayon nga malilian ang kadako sa patong sa orihinal nga presyo sa matag lamppost.

Apan ang akong punto mao: si Ebdane ang adunay dakong kamot sa kontrobersiya ug nagtuo ko nga mabitik ra siya niini kun suklan sa mga gagmay’ng opisyal nga maoy giuna sa pagsagpa og suspensiyon.

Sa kaso ni Gwen, kinsa man ang kauban niyang opisyal nga nagpatukod nianang CICC, gawas ni Architect Manuel Guanzon?

Wala! Ang pundo nga gigamit niini gikan sa panudlanan sa probinsiya. Kini bisan pa man nga ang 12th Asean summit usa ka national event ug dili kalihukan nga iya lamang sa lalawigan.

Ang husto unta, pundo sa nasyonal nga kagamhanan ang gamiton sa pagpabarug sa CICC.

Pastilan, sa kapin P500 milyones nga salapi sa probinsiya sa Cebu nga gigamit sa pagpabarug sa CICC, pila na unta ka karton nga tambal ang mapalit niini? Pila na ka lawak-saringan? Pila na ka health centers? Pila na ka kilometrong karsada ang mapa-aspalto? Pila na ka lungsod ang matabangan sa nag-una nilang panginahanglang proyektong imprastraktura ug pagtabang sa mga kabus nga mga mag-uuma?

Maayong dili luagan sa mga militanteng grupo ug ni Saavedra ang pagtuok ni Gwen hangtod mosuka sa "accounting" kun subay sa nagasto nianang CICC nga maoy labing gikinahanglan sa publiko.

Kun walay gitaguang binuang si Gwen, simple ra kaayo ang pagpa-printa sa mga pamantalaan sa accounting sa nagasto nianang CICC. Sayon ra kaayo kini nga himuon, apan naglibog kita nganong bukid kaayo kaniya ang paghimo niini.

* * *

HIKOG. Ang kapolisan wala gyuy nahimo sa pagpalayo sa mga tawo nga nanguryoso sa eksena ibabaw sa gi-renovate nga edipisyo sa Barangay Pahina San Nicolas nga nahimutang sa tumoy’ng bahin sa C. Padilla, duol sa taytayan sa Colon.

Sumala pa sa mga batid sa armas, ang mga nanguryosong mga residente ug nahiagi sa lugar sulod pa sa "effective range" sa .357 nga gigunitan sa tawong nagwarawara sa armas ibabaw sa barangay hall ug naghikog hangtod natagak.

Mao unta kini unahon sa kapolisan. Aduna gani ingon niining eksena nga kinahanglan i-secure ang mga tawo, magdestino unta og tropa sa kapolisan ang kadagkuan aron mo-cordon sa area aron pananglit magpataka og pabuto ang naggunit og armas, dili ingon kadako ang kakuyaw nga may maigo sa saag nga bala.

* * *

MARY ANN. Daghan ang nakadayeg ni Mary Ann delos Santos.

Bisan nasayod siyang maglisud siya pagpuhal sa gahum ni Mayor Tomas Osmeña nga nakagamot na sulod sa dugay’ng katuigan, wala siya magduhaduha pagdawat sa hagit nga atbangan ang mayor.

Gani, pagkasayod pa lang ni Tomas nga modagan batok kaniya si Mary Ann, nakapamalikas gyud siya tungod kay dili siya gustong masakbangan og babaye.

Tingale makaingon kamo nga dili makatupong si Mary Ann sa pagka-maayong lider ni Tomas. Si Tomas migamit sa iyang pagka-arogante sa iyang pag-manage sa City Hall.

Apan si Mary Ann may ikapanghambog usab tungod kay usa siya ka awardee nga kapitan, ang iyang award dili lang dinhi sa siyudad o rehiyon kun dili nasyonal nga pasidungog.

Ang iyang barangay sa Lahug nahimong pilot area sa pipila ka mga proyekto, usa na niini ang computerization.

Ang iyang barangay may nindot nga bomberohan.

May mga estudyante nga nagtuon sa kursong Master in Public Administration o Doctor in Public Administration nga mihimo sa Barangay Lahug nga sentro sa ilang pagtuon.