Si Gaia ug si Dr. KC Tan

TIKDOL SA PORDOY - TIKDOL SA PORDOY Ni John Rey Saavedra () - November 29, 2006 - 12:00am
Wala ko magdahum nga makasugat ko'g drama sa kinabuhi niadtong Lunes sa buntag. Gitawagan ko sa usa nako ka higala ug nag-imbitar og press conference bahin sa liver transplant.

Bisan hilabihang gamaya sa akong kasinatian sa natad sa medisina kay igo ra gyud sa paghunad og betadine sa samad ug pagpatumar sa mga tambal sa ubo ug hilanat, wala ko magpanuko og tambong tungod sa unod sa presscon nga bag-o alang kanako.

Sa Mizu Restaurant sa Waterfront Hotel Lahug nahimamat namo ang usa ka doktor nga Singaporean nga sa akong pagtuo yungit mo-estorya og inenglis, apan sa dihang pagsugod niini og tabi, gipildi ko sa gidaghanon sa pulong nga iyang nabatbat atol sa maong okasyon.

Si Dr. KC Tan (Dr. Tan Kai Chah) nailang Dr. Magic Hands sa Singapore mipunit sa mikropono ug walay puas sa pagpasabot unsa kining liver transplant.

Apan kaming mga sakop sa media nga didto sa presscon, gawas nga nalingaw sa iyang pag-edukar kanamo unsa kining liver transplant, natandog kaayo sa dihang giasoy niya giunsa niya pagluwas ang batang si Gaia Bianca Pasamba, anak sa magtiayong taga Sta. Rosa, Laguna.

Si Gaia 10 ka bulan pa lang ang edad sa dihang nakit-an sa mga eksperto nga adunay biliary atresia diin miresulta sa dili pag-function sa iyang atay tungod sa mi-clog nga "duct" kon tubo nga magdala sa mga "bile" gikan sa atay ngadto sa tinai. Tungod sa dili normal nga pag-agas sa "bile" gikan sa atay ngadto sa tinai, nagdulot kini og kadaot sa iyang atay.

Gisulayan og ilis ang duct pinaagi sa pagputol og gamay'ng bahin sa iyang tinai ug giilis sa mi-clog nga duct, apan wala kini magsilbe, hangtod nga ang iyang inahan nga si Ybeth, mihunong na sa pagtrabaho isip magtutudlo sa pre-school. Si Ybeth ug iyang bana nga si Giorde nga usa usab ka magtutudlo, nakadesider nga ipa-liver transplant na lang si Gaia.

Apan naglibog ang magtiayong Pasamba asa nila dad-a ang ilang gamay'ng anghel nga wala may liver transplant sa mga bata o pediatric liver transplant dinhi sa Pilipinas.

Nahasirisiri og pangita'g paagi ang magtiayong Pasamba. Daghang tawo nga nasayod sa kapait nga giantos ni Gaia ug miapil sa paninguha nga ma-operahan ang bata.

Hangtod naabot sa ilang dunggan ang ngalan ni Dr. KC Tan, ang unang doktor sa kalibutan nga nakahimo og unang living donor liver transplant (sa ato pa, liver transplant diin ang gamiton nga atay nga ipuli o ibutang sa tawong nagkinahanglan og transplant dakong buhi) didto sa United Kingdom.

Na-operahan gyud si Gaia!

Motuo mo'g sa dili, himsog kaayo si Gaia karon. Pagkugos nako ni Gaia, gipugngan ko lang nga makatulo akong luha nga nagsud-ong sa mga badlis agi sa "surgical blade" nga naglagbas sa tiyan sa bata. Nakaingon ko samtang nagsud-ong niya: "Fighter gyud ning bataa."

Si Dr. Tan mipasabot nga ang gamay lamang kaayong bahin sa atay sa iyaan ni Gaia ang gikuha ug gibutang sa bata. Nangutana ko ni Dr. Tan nga mo-uban ba sa pagtubo sa bata ang gamay nga atay nga gibutang ni Gaia.

Dili unta ko motuo nga motubo og uban ang atay sa pagtubo sa batang si Gaia, apan timan-i nga na-operahan siya wala pay usa ka tuig ang edad, apan karon nga duha na kapin iyang edad, nakatuo ko sa dihang nagsud-ong ko niyang sama na lamang sa ubang normal nga bata. Motubo gyud diay og apil ang atay!

Mapasalamaton kaayo ang magtiayong Pasamba ni Martin Nievera nga mituyo lamang og uli dinhi sa nasud aron sa pagkanta alang lamang sa operasyon ni Gaia. Ang concert dako og natampo sa pagbayad sa operasyon ni Gaia.

Mianhi og tuyo si Dr. Tan isip mamumulong sa Asia-Pacific Digestive Week Congress sa Waterfront Hotel Lahug sugod sa Nobiyembre 26 ngadto sa 29.

Atol sa iyang pagka-senior liver transplant surgeon sa King's College Hospital sa London niadtong 1986 ngadto sa 1994, si Dr. Tan mi-train og 26 ka mga surgeons sa hepatobiliary ug liver transplant surgery.

Ang iyang pagbiyahe sa Cebu giabagan sa Parkway Healthcare Medical Referral Center, ang representante sa Parkway Group Healthcare of Singapore dinhi sa Pilipinas. Ang referral center, alang niadtong nagkinahanglan og dugang pagpasabot og liver transplant diin ang donor sa atay mahimo nga buhi (ug dili patay), mahimong matawagan ang referral center sa Medical Plaza Makati sa numero 751-82-25 ngadto sa 27. Mahimong pangitaon si Dr. Yvonne Lucero o Seetoh Yit Fong.

ATAY DR. TAN GAIA IYANG LIVER PASAMBA TRANSPLANT WATERFRONT HOTEL LAHUG
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with