Panganti

Sa miaging semana mimando si Presidente Gloria Macapagal-Arroyo sa Department of Budget and Management sa pagpagawas og usa ka bilyon (P1Billion) ka pesos ngadto sa armadong kusog sa nasud dugang sa lain pang lima ka bilyon (P5Billion) ka pesos nga gahin niini matag tuig. Kini atron sa ingon gamiton sa pagpamalit og surplus nga Huey helicopter, attack helicopter ug uban pang gikinahanglan sa pagpakigbatok sa mga sakop sa New People's Army.

Ang Presidente mihatag sa armadong kusog sa nasud og usa ngadto sa duha ka tuig sa pagpuhag sa mga sakop sa New People's Army. Apan matuman kaha kining maong panganti sa atong presidente? Armas ba ang sulbad sa problema sa insurhensiya dinhi sa nasud?

Ang usa ka bilyon ka pesos nga gahin alang sa pagpamalit og surplus nga huey helocopter, attack helicopter ug uban pang kahimanan sa pagpakig gubat dili maoy sulbad sa insurhensiya sa nasud. Ang sulbad ug tubag sa suliran sa insurhensiya mao ang gobyerno nga matinod-anon, adunay konsensiya ug di tigpakaaron-ingnon. Gobyerno nga makahatag og pagkaon sa katawhang gigutom ug makahatag og hustisya sa katawhang biktima sa inhustisya. Gobyernong mibati sa mga kasakit nga nasinati sa katawhang nag-ilaid sa tumang kalisod ug gidaug-daug.

Kasagaran sa mga igsoon nato nagpamiyembro sa New People's Army dili tungod kay mituo sila sa prinsipyo sa mga komunista kon dili tungod kay biktima sila sa inhustisya ug pagpanaugdaug. Pipila lamang kanila ang misaka sa bukid ug nag NPA tunghod kay mitoo sa prinsipyong komunista.

Ang duha ka tuig nga tagal sa pagpuhag sa mga sakop sa New People's Army taas ra kaayo kini para sa armadong kusog sa nasud ug sa atong gobyerno kon ugaling mahatagan gilayon og pagtagad ang panginahanglanon sa iyang katawhan.

Ang atong gobyerno kinahanglan nga mahigmata sa iyang paghikatulog ug atubangon ang kamatuoran nga siya mismo ang suliran, ug nag-awhag sa katawhan sa pagsaka sa bukid aron motipon sa mga walhon.

Ang atong gobyerno hugot nga nagkampanya batok sa insurhensiya pero siya ra mismo ang labing dako nga promoter sa insuhensiya.