Supina ni Sara
Mas lig-on ang mga sukaranan sa defense team ni Bise Presidente Sara Duterte sa pagsupak sa mosyon nga ipasaka sa prosekusyon nga moawhag sa Senate impeachment court sa pag-supina niya aron maoy mangunay sa pagtubag sa mga pasangil:
Klaro ang probisyon sa 1987 Constitution nga dili mapugos ang sinumbong, sama ni VP Sara, sa pagsaksi batok sa iyang kaugalingon; ug
Wala pay impeachment court sa kasaysayan sa Pilipinas, sa Estados Unidos ug ubang kanasuran nga ni-supina sa mga sinumbong sa pagtambong sa husay ug pagpangunay sa pagpanalipod sa ilang kaugalingon.
***
Gawas nga wala isupina sa Senate impeachment court ang mga sinumbong sa duha ka impeachment trials sa Pilipinas–Presidente Joseph Estrada sa 2001 ug Chief Justice Renato Corona sa 2012–wala sab moawhag og supina ang prosecutors nga gipangulohan ni Kongresista Joker Arroyo sa Makati sa 2001 ug Kongresista Neil Tupas sa Iloilo sa 2012.
Mao nga ang defense team ni Estrada nga gipangulohan ni Estelito Mendoza ug ni Corona nga gipangulohan ni Serafin Cuevas wala makasugat niining tahas nilang Sheila Sison ug kaubanan pagpalayo ni VP Sara gikan sa witness stand.
***
Pero mas maglisod si VP Sara pagpasabot sa katawhan nganong gilikayan ang iyang impeachment trial tungod sa gamhanang ehemplo ni Corona: Nga niboluntaryo pagtubag sa mga pasangil batok niya.
Kon si Corona nga wala mopasidaan og bloodbath isog nga niatubang, nganong kakak man si VP Sara? Human nipasalig nga tubagon ang duha ka tuig nang mga pasangil sa proper forum, lisod dawaton nganong dili lang gihapon moatubang karong nadayon nang impeachment trial (nga iya sang gibabagan).
***
Labing lisod nga lalison ni VP Sara ang katungod sa katawhan sa pagpakisayod hain padulong ang ilang buhis. Iyang mga sinaligan nitug-an nga gihatag nilang kuwarta ngadto sa dili authorized nga security officers kay maoy sugo ni VP Sara. Sa mga transaksiyon nga wala silay kasayuran, si VP Sara ang gitumbok nga labing suhito.
Sa ato pa, si VP Sara ray makapasabot sa kadudahang pagkahurot sa iyang P612.5 milyones nga confidential funds. Ug iya rang presensiya sa impeachment trial ang makahatag sa senator judges og makiangayong sukaranan sa paghukom kon angay ba siya nga magpabilin sa puwesto.
- Latest
