Recycled nga hudlat
Sa di pa mahinayak si kanhi presidente Rodrigo Duterte og lab-as sa karaan niyang hudlat sa gubat nukleyar kon magpadayon ang Pilipinas sa pagsukol sa China sa West Philippine Sea (WPS), nga gipamugos g’yud niya og tawag nga South China Sea, ug sa di pa mag-piyesta ang iyang troll army, nga ambot di ba mga langyaw ang nagbayad, sa pagwara-wara sa propaganda sa China nga sila ang tinuod nga tag-iya sa WPS, angay silang pahinumdoman nga:
• Isog nga nisukol ang atong silingang mga nasud sa pagsuway sa China pag-ilog sa ilang mga teritoryo;
• Gihulga sab sa China ang ilang mga lider og gubat;
• Lahi ni Duterte, ang ilang mga lider wa mokakak; ug
• Way gubat nga niulbo hangtod karon.
* * *
Unang resibo:
• Sa 2016, gisugo ni Indonesia President Joko Widodo ang navy pagpusil sa fishing boats sa China nga nisud sa ilang teritoryo sa Natuna Islands ug gitanggong ang mga mangingisda;
• Nipasangil ang China nga nasamdan ang mga mangingisda ug nipasidaan nga magkagubot ang rehiyon kon ang Indonesia padayong mogamit og puwersa; pero way nahimong China dihang
• Sa 2018, giablihan ni Widodo ang base militar sa Natuna Islands nga dunay 1,000 ka sundawo.
* * *
Ikaduhang resibo:
• Niawhag ang Malaysia sa China sa pagbadlong sa Chinese Coast Guard ug navy ships nga nisud sa kadagatan sa Malaysia ka-89 ka higayon sugod 2016 hangtod 2019; hangtod nga
• Sa 2020, gitanggong sa Malaysia ang 60 ka tripulante sa Chinese vessels nga nasakmit sa kadagatan sa Tanjung Setapa nga kabahin sa Exclusive Economic Zone sa Malaysia; sama sa naandan
• Nipasidaan ang China og kagubot pero wa mamilok ang Malaysia.
* * *
Ikatulong resibo:
• Sa 2014, nisukol ang Vietnam sa pagtukod sa China og oil rig sa kadagatan sa Vietnam ug niulbo ang gubot nga anti-China riots sa Vietnamese cities;
• Sa 2017, gipadayon sa Vietnam ang oil drilling sa ilang kadagatan bisan sa hulga sa China nga atakehon ang Vietnamese outposts sa Spratly Islands; ug nakatag-an ka
• Way pangatake nga gihimo ang China.
* * *
Bisan sa kaisog sa atong mga silingan, way gubat nukleyar nga niulbo. Sa pikas nga bahin, bisan sa katalawan ni Duterte, wa mohunong ang China pagpanghasi sa WPS.
- Latest
