Lagda nga bahaw ug tukar-tukar

Nituman ang Korte Suprema pero nisukwahi ang pipila ka politiko sa mga lagda sa Inter-Agency Task Force (IATF) batok sa COVID-19 sa mga lugar nga gipaubos sa Alert Level 2, labi na sa pagbanhaw sa limitasyon sa kapasidad sa nagkalainlaing mga lugar:

• 50% ra sa kapasidad ang mapasud sa indoor venues; ug

• 70% ra sa kapasidad ang makagamit sa outdoor venues.

Wa nila mabantayi nga way kausaban nga mahimo ang bag-ong resolusyon sa IATF: Una, kay bahaw na ni; ug ikaduha, kay hagbay rang wa tumana ang mga probisyon ini.

 * * *

Nahinayak og sanong ang Korte Suprema ug nakabuylo og baraw ang pipila ka lokal nga mga opisyal sa wa pa mapasabot nga bahaw diay ang resolusyon:

• Di lang tungod kay niadto pang Abril 14 giluwatan sa IATF pero sa Abril 22 na gipagawas sa Department of Health (DOH) nga maoy pangu sa IATF (maong nauwahi na sa gitakda untang implementasyon sa Abril 15-30, 2023);

• Kon dili tungod sab kay ang resolusyon igo ra diay nga nipadayon sa alert levels nga gitakda sukad pa sa Hunyo sa niaging tuig.

 * * *

Laing sayop nga hubad sa resolusyon mao nga mao ni tubag sa IATF sa pagsulbong sa bag-ong mga kaso sa COVID-19 sa Pilipinas. Ambot gituyo ba o natayming lang ang pagpagawas ini dihang nihunong ang DOH sa inadlaw nilang update sa bag-ong mga kaso ug positivity rate.

Uwahi nang pasabot nga Alert Level 2 sa Sugbo, Bohol, Negros Oriental, ug ubang lugar nga ubos ang mga kaso kay wa kaabot og 70% ang nabakunahan batok sa COVID-19 sa ilang target population.

 * * *

Ang wa mapasabot sa DOH ug IATF mao ang kapakyas sa pagpatuman sa mga limitasyon sa mga tapok sa katawhan sa mga lugar nga ubos sa Alert Level 2 (apil na sa mga korte nga giduma sa Korte Suprema):

• Tungod ba kay natabonan sa pag-apura sa pagpangabli na sa tanang negosyo, aron makabalik nang tanang trabahante, ug sa tanang tourist destinations, aron mamalik nang lokal ug langyawng mga turista?; o

• Tungod ba kay, sama sa naandan, tokar-tokar ang pagpatuman sa mga lagda ug karon na lang nahinumdoman tungod sa lab-as nga sulbong sa mga kaso?