Paghubad sa tinuod nga mensahe
Sa sunod higayon nga moingon si Executive Secretary Victor Rodriguez nga busy siya, mahimo nga ang tinuod niyang gipasabot mao nga di siya ganahan nga manubag og mga pangutana. Kay maglisod siya og tubag sa mga pangutana.
Labi na kon nakabuylo og pa-goryo-goryo nga gilaktawan ang iyang upisina ug ang Malacañang sa importante nga mga desisyon sa pipila ka ahensiya. Unya nitumaw pa g’yud nga siyay nagsugo ug duna pay mga dokumento nga napirmahan nga nagmatuod nga siya diay, hinaot nga may pagtugot gikan sa presidente, ang utok sa kalibog.
* * *
Sa sunod higayon nga mopahibawo si Presidente Ferdinand Marcos Jr. nga naghimo siya og research, nga nagmatuod nga di diay tinuod nga dunay krisis ang nasud, ang tinuod diay niyang gihimo mao ang pag-usab sa iyang nahauna nga desisyon.
Pero kay di man siyang kaangkon og responsibilidad sa paglikoy, kay masaypan unyang wa kasabot sa iyang desisyon, nagdalidali og pangita og mga opisyal nga matulisok. Andam ang iyang administrasyon nga mosakripisyo bisan sa iyang mga gisaligan. Aron pagpreserbar sa ilang gipatuo nga brayt siya ug dunay lig-on nga baruganan.
* * *
Sa sunod higayon nga moingon ang Malacañang nga nakahukom nang presidente pero wa pay executive order, ang tinuod nilang mensahe mao nga nagpadayon pang pagpasabot sa presidente sa mga termino nga maapil sa proklamasyon.
Pananglitan mahimong naglibog pa unsay kalainan sa outdoors ug open spaces, diin matangtang nang face masks. Nangita pa tingali og mas masabtang sampol nga ang outdoor gawas sa buildings pero dunay ali samtang ang open spaces hawan nga way mga butang nga naglibot.
* * *
Sa sunod higayon nga may opisyal nga pasaligan sa Malacañang nga makahimo siya pagtambong sa tanang tigom ug makapirma sa tanang dokumento para sa presidente, angay siyang pahinumdoman nga ang ulog-ulog kinopya ra sa memorandum nga nadawat ni Agriculture Senior Undersecretary Leocadio Sebastian, nga maoy unang nabitay sa bulilyaso sa importasyon sa asukar.
Hinaot nga nag-amping si Bise Presidente Sara Duterte Carpio sa tanang dokumento nga iyang gipirmahan para sa presidente sa mga adlaw nga siya ang officer in charge sa Malacañang. Di siya sama kadali nga taktakon sama ni Sebastian. Pero mahimo siyang mapaka-uwawan.
- Latest
