Panaugdaog sa Sinulog
Bisan wa pa mahuman ang grand stage sa Sinulog 2020 sa Cebu City Sports Center, gitugotan na ang dancing contingents sa paggamit sa bantawan alang sa ilang pagbansay. Kay makatabang sa paghingpit sa ilang makuti nga pangandam uban ang pangandoy sa pagpanghawod sa tinuig nga panagtigi.
Lahi sa subsob nilang pagbansay sa kadalanan ug sa ilang barangay gym, ang aktuwal nga pagtungtong sa bantawan makahatag nila sa tukma nga sukod sa kinatibuk-ang langyab sa luna nga kadaganan, kaambakan, kahigdaan ug kaligidligiran sa ilang mga mananayaw ug kapahimutangan sa higante nilang props.
***
Tungod sa kadaghan sa nihangyo nga magbansay-bansay sab sa bantawan, gihatagan ang matag contingent og tagsa lang ka takna. Kay di man mahimong sa adlawan silang tanan, may mga napugos sa pagsugot sa mga takna sa tungang gabii ug sa kadlawon nga gitakda alang nila.
May gamay hinuong problema: Gagmay’ng mga bata ang pipila kon di man kasagaran sa mga mananayaw sa nagkalainlaing contingents. Makiangayon ba ang pagpugos nila sa pagtukaw sa mga takna unta sa ila nang pagkatug aron nga matarung ang ilang sayaw ug modako ang ilang kahigayonan sa pagdaog?
***
Sayon alang sa mga tigpasiugda ang pagpanalipod sa di makitawhanon nga mga gimbuhaton nga ilang gipahamtang sa mga bata: Bisan sa ilang kalinghod, ang kabataan andam nga mosungasong sa labing lisod nga mga pagsuway --way tarung nga pahuway ug init ug uwan sa kadalanan-- tungod ug alang sa tim-os nilang pagbalaan ni Señor Santo Nino.
Apan nahibawo tang tanan nga way kapilian ang mga bata. Di nila mahimong suklan ang panagkonsabo sa ilang mga ginikanan, kadagkoan sa mga tulonghaan, kabaranggayan, mga dakbayan ug kalungsoran.
***
Kinsa man ang mopatuman sa mga balaod nga nipatigbabaw sa katungod sa matag bata nga mapanalipdan gikan sa mga pagpahimus, mga pagpanlingla, mga hulga ug ubang kahimtang nga makadaot sa ilang panlawas, panghunahuna, balatian, ug katilingbanon ug moral nga paglambo?
Sa sunod higayon nga di kang kapugong pagsiyagit sa pagdayeg sa gagmay’ng mga bata nga labihang sayona nga nihimo sa kinalisdang mga sayaw sa kadalanan ug bantawan sa Sinulog Grand Parade sunod Domingo, hinaot maibanan ang imong kahinangop sa kaamguhan sa kapid-an ka takna sa pagpahimus nga ilang nahiagoman.
- Latest
