Bisan inutil, hakog sa gahom

Tungod sa kainutil sa nasudnong gobyerno sa pagbadlong sa pinatuyangan nga pagsuyop sa tubig gikan sa ilawom sa yuta sa Metro Cebu sa nangaging daghan na uyamot nga katuigan, nga nisangpot na sa pag-rasyon og tubig sa Metro Cebu Water District (MCWD) ug sa pribadong mga kompaniya sa tubig, may sukaranan ang dugay nang awhag sa local government units nga itugyan nila ang napasagdan nga gimbuhaton.

Apan sama sa uban nga nasudnong mga buhatan sa gobyerno, nagdumili ang National Water Resources Board (NWRB) sa pagpakigsawo sa iyang gahom.

* * *

Akong nahinumdoman si kanhi Cebu City councilor Nida Cabrera, nga karon maoy pangu sa City Environment and Natural Resources Office (Cenro), nga usa sa kusganong niawhag sa NWRB sa pag-deputize sa mga dakbayan ug kalungsoran sa di pa hingpit nga ma-ughan sa groundwater ang Sugbo ug ubang bahin sa Pilipinas.

Nagpapating ang NWRB. Nagtukod tuod og sangang mga buhatan sa Cebu City ug Davao City apan wa gihapon kabaraw sa iresponsableng pagsuyop sa groundwater. Ug atubangan sa nagkalapad nga huwaw, nga gitakdang molungtad hangtod karong Agosto, mahimo nga uwahi nang tanan.

* * *

Way kalainan ang NWRB sa ubang nasudnong mga buhatan nga bisan naklaro nga inutil sa pagpatuman sa ilang mga lagda sa Sugbo ug ubang mga lalawigan nagpaugat gihapon og balibad sa pagpatabang sa lokal nga mga opisyal.

Sama rang NWRB sa Land Transportation Office nga bisan wa g’yuy nahimo sa pagpatuman sa nasudnong mga lagda sa trapiko, gawas sa tokar-tokar nga paukyab, pabilin nga nagdumili sa pag-deputize sa traffic enforcers sa LGUs nga nagbantay sa kadalanan adlaw ug gabii.

* * *

May laing reklamo si Chairman Joel Mari Yu sa MCWD batok sa NWRB: Wa sab silay nahimo sa pagbaraw sa pribadong mga kompaniya ug subdivisions nga nag-negosyo og tubig bisan way lisensiya gikan sa NWRB, Department of Health, ug ubang mga buhatan.

Ug ang pipila nga tsamba nilang nasakpan nga ilegal nga nagsuyop og tubig gikan sa ilawom sa yuta igo lang gipabayad og multa ug gipasagdan lang gihapon sa pagpatuyang og suyop sa groundwater bahala nang mga Sugbuanon asa mangita og tubig kon hingpit nang mahubsan.