Manila ra gihapoy pinangga

Sa kinapungkayan sa iyang pagpanibya, dihang nitalikod sa pagka Diego Salvador sa drama, nagsugod pagka Andoy Pordoy sa iyang inadlawng sibya ug pila ka tuig sa wa pa ma-bise gobernador sa Sugbo, si Nanding Celeste nitug-an sa bag-ong mga magsisibya nga labihang nihita sa ilang tubig sa Alcoy nga makaligo lang kon mosayo og mata ug modasmag og punoan sa saging nga puno pa sa yamog.

Nangatawa ang mga naminaw. Way nakaseguro nagtiaw o seryuso ba. Way nagsusi taga Alcoy ba g’yud siya. Usa ko sa nalingaw sa iyang istorya.

* * *

Nangligid ang daghang katuigan una nako natino nga may sukaranan ang iyang sugilanon. Gitug-anan ko ni Eutemio Ternate, disaster officer sa silingang lungsod sa Boljoon sa habagatang Sugbo, sa niaging semana nga nangandam ang pipila sa ilang mga molupyo sa El Niño pinaagi sa pagpananom og daghang saging.

Ang mga punoan nga nakapamunga na ilang lungagan ug butangan og imbudo aron nga masawod ang limpiyo nga tubig nga mainom. Matod ni Ternate niinsistir ang ilang katiguwangan nga mas daghan ang tubig nga matigom kon ang pagpanguha maatol nga taob ang dagat.

* * *

Dalayegon ang katakos sa taga Alcoy ug Boljoon sa pagpangita og luwas nga mga tinubdan sa tubig. Apan ang ilang kasinatian nagmatuod sab nga wa pa kahatagi og mas malungtaron nga tubag ang dugay na nilang kakuwang sa tubig atol sa ting-init, labi na kon madungan sa huwaw sama karong tuiga.

Bisan sa Metro Cebu, wa pay gihimong mga lakang pagsulbad sa kanihit sa tubig bisan nisamot karong tuiga tungod sa El Niño ug sa pag-angkon sa Metro Cebu Water District (MCWD) nga hapit na matilok ang groundwater.

* * *

Mas pait ang atong kahimtang sa pagkapawong sa mga gripo sa pipila ka bahin sa Metro Manila sa niaging semana. Nagkara-kara dayon ang Malakanyang ug ubang buhatan sa gobyerno. Gitakda gani nga mopirma si Presidente Rodrigo Duterte og executive order pagsulbad sa krisis sa tubig.

Mahimong may mga lalawigan gawas sa Metro Manila nga mas nihit og tubig kay sa Sugbo. Apan ambot magpakabana bang Malakanyang nila. Sa ato pa, bisan Bisaya nang presidente, ang Pilipinas morag nagsugod ug natapos lang gihapon sa Manila.