Pamolitika sa tiyan

Usa sa labing gitamod ni anhing presidente Ferdinand Marcos, nga mora og nataligam-an sa naghangad pag-ayo niya nga si Presidente Rodrigo Duterte, mao ang politika sa tiyan. Kumbinsido si Marcos nga bisan ang dagko ug makalilisang niyang mga gahom ubos sa Martial Law di kapiog sa kasuko sa katawhan kon magkutoy nang ilang tiyan.

Napamatud-an ning Marcos sa pagdaog sa iyang unang termino pagka presidente batok sa incumbent nga si Presidente Diosdado Macapagal, amahan ni kanhi presidente Gloria Macapagal-Arroyo, ginamit ang pagsulbong sa presyo sa mga palaliton ug ang slogan nga, “Macapagal makamahal!”

* * *

Sa ikalimang adlaw sa diktadura ni Marcos, niadtong Septiyembre 26, 1972, ginamit ang gahom paghimo og balaod nga iyang gisakmit human kandadohi ang Kongreso, niluwat siya sa ikaupat nga presidential decree nga nagtukod sa National Grains Authority (NGA).

Gihiusa ni Marcos sa duha ka ahensiya: Ang Rice and Corn Board (RICOB), nga nagduma sa patigayon sa bugas humay ug mais, ug Rice and Corn Administration (RCA), nga maoy tig-apud-apod sa baratong bugas sa gobyerno atol sa tingnihit. Gipalapdan niya ang mandato sa NGA sa pagpalambo sa bugas humay ug mais, sorghum, munggos, ug mani ug pagdason sa Masagana ‘99 para sa rice self-sufficiency sa Pilipinas.

* * *

Human sa siyam ka tuig, gipulihan ni Marcos ang NGA sa National Food Authority (NFA) pinaagi sa Presidential Decree No. 1770. Gipaubos niya sa NFA ang uban pang pagkaon, sama sa prutas, utanon, isda, ug mga delata.

Mao ni nakapatumaw sa Kadiwa rolling stores ni kanhi unang ginang Imelda Romualdez Marcos nga namaligya sa inadlaw’ng mga panginahanglan.

* * *

Ambot nganong wa sunda ni Presidente Duterte ning pamolitika sa tiyan sa iyang idolo. Tungod ba kaha sa kalawom sa iyang pamalandong nga nakapakumbinser niya nga estupido ang Ginoo hangtod karon wa pa g’yud kabawi sa makauuwaw’ng bulilyaso isip labing unang presidente nga nabasiyohan og bugas ang tanang bodega sa gobyerno?

Kay hagbay rang niabot sa Sugbo ang gidalidali pagkompra nga bugas humay gikan sa Vietnam ug Thailand apan ang iyang pinangga nga mga tagduma sa NFA wa mag-apura sa pagpabaha sa baratong bugas sa kamerkadohan aron nga mapalit na sa labing kabos nga mga konsumidor.