Sindikato sa yuta

May sukaranan ang kahadlok ni Barangay Kapitan Ramil Ayuman sa Apas sa Dakbayan sa Sugbo. Nga mahurot ang mga sitio sa Apas sa pundok sa dagkong negosyante nga nagpatuyang og pangangkon sa mga luna nga may kontrobersiya ang pagpanag-iya. Gihagit ni Ayuman silang Cebu City Mayor Mike Rama ug Cebu Governor Junjun Davide sa pagtabang sa mga molupyo sa di pa maapsan sa nag-ung-ong nga mga kaso sa korte.

Wa mag-inusara si Ayuman sa iyang pagduda. Ubang local government units, kahugpongan sa mga kabos sa dakbayan ug bisan dagkong kahugpongan ug adunahang mga korporasyon nangangkon nga nabiktima sab sa dagkong sindikato nga niggamit sa ilang mga koneksiyon pagpangilog og mga luna.

* * *

Gidasonan ni Rama ang mga pasangil ni Ayuman. Nitug-an si Rama sa DYAB Radyo Patrol sa pipila ka kaso nga nakapakumbinser niya nga may adunahang mga negosyante nang-raket sa pagpangilog sa pagpanag-iya ug pagpamaligya og kuwestiyonableng mga luna ngadto sa gobyerno.

Apan way nakitang kahigayonan si Rama sa pagbungkag sa mga sindikato sa di pa sila makabiktima sa kabos nga mga molupyo ug ubang lehitimo nga mga tag-iya sa mga luna. Nipadayag si Rama og pagsalig sa mga hukmanan ug sa sistema sa hustisya nga maoy makabisto sa tinuod nga katuyoan sa mapahimuslanon nga mga negosyante.

* * *

Giawhag hinuon ni Rama ang mga molupyo nga mabiktima sa mga sindikato sa pag-organisar dayon sa ilang kaugalingon ug pagdangop dayon og kasaligang mga abogado sa di pa makabuylo ang mga maniobra sa mga sindikato. Matod niya mas lisod nang babagan ang mga sindikato kon mahukman nang mga kaso nga ilang gipabaha sa mga hukmanan.

Nipasalig si Rama nga ang batan-on ug ligdong nga mga abogado sa City Hall di molunga sa paglaban sa kabos nga mga molupyo kon tinuod silang gidaugdaog sa mga sindikato. Matod ni Rama di niya talikdan ang mga molupyo bisan pa kon iyang mga higala ang mga negosyante ug ilang mga abogado nga mangilog sa mga luna.

* * *

Mipadayag og kasubo si Ayuman nga ang dagkong mga politiko sa Sugbo kutob lang sa pagarpar apan wa pa gyoy klarong mga lakang batok sa mga sindikato sa yuta. Gipasanginlan niya ang pipila nga maayong mo-ulug-ulog sa mga molupyo kon hapit nang piniliay apan di pakita sa ubang mga higayon nga gikinahanglan na unta kaayong ilang tabang.

Labing epektibong panagang nga mahimo nilang Rama, Davide ug ubang dagkong opisyal sa gobyerno mao ang pagtarung nang daan sa mga dokumento sa pagpanag-iya sa mga luna. Gikinahanglan nga magkasabot ug maghiusa sila. Kay kon ang kadagkoan sa City Hall ug ang Kapitolyo padayong mag-ilog sa pagpanag-iya sa pipila ka luna, magngisi ang mga sindikato sa pag-apil sa kaguliyang.

* * *

Email: [email protected]