Hulga sa mga hinabang

Kon naproblema mi sa pagpangita og kasakyan sa mga hinabang sa mga Sugbuanon alang sa mga biktima sa linog sa Bohol karon di na ming kaato sa pagkarga sa mga trak, mga barko, mga barge ug mga ayroplano nga nagkadungan pagtanyag sa pagda sa mga hinabang nga natigom sa Kapamilya Relief Campaign.

Kakuwang sa mga boluntaryo ang usa sa labing dako namong limitasyon. Kinahanglan ang pinaspasay nga pagkarga. Apan kasagaran sa among mga boluntaryo mga tinun-an nga di makasakwat sa bug-at nga sinakong bugas ug binotelyang tubig nga kinahanglang hakuton ngadto sa habog nga mga trak o containers. Maong nagkinahanglan mi og dugang boluntaryo nga mas dagko og braso.

***

Mao ni nakababag namo sa pagpuno sa dakong barko sa Gothong Southern Shipping Lines, ang labing unang commercial vessel nga gitugotan sa Philippine Coast Guard (PCG) pagdunggo sa pantalan sa Tacloban City.

Makahimo unta sila pagkarga og hangtod 100 ka 20-footer containers sa relief goods apan wa ra katunga ang among napuno.

Di ming kapugos sa tanang dagko og braso pagtampo sa ilang kusog ug panahon. Maong manghangyo na lang mi sa mga nitanyag og mga sakyanan nga mohakot sa mga hinabang sa mga Sugbuanon sa pagpakapin og mga kargador aron mas daling mapuno ang ilang mga trak ug containers ug di malangay ang ilang mga biyahe.

***

Lain namong suliran mao ang seguridad sa mga boluntaryo nga mokuyog ug moapud-apod sa pinutos nga mga pagkaon ug binotelyang tubig ngadto sa mga biktima sa bagyong Yolanda.

Kaingon namo nga kutob ra sa Tacloban ang mga pagpanlungkab ug pagpangawat. Apan nagkadaghan ang mga timaan nga nikatap nang mga hulga sa ubang bahin sa Eastern Visayas.

Mga boluntaryo nga nikuyog sa duha ka dagkong trak nga puno sa relief goods sa mga Sugbuanon alang sa mga biktima sa bagyo sa Carigara, Leyte ang labing uwahing biktima. Wa silang kalahos sa Carigara kay niulbo ang pinusilay tali sa kasundalohan ug armadong mga tawo sa ilang unahan.

***

May mga pasangil nga kabahin sa batasan sa mga Waray ang kainit og ulo ug kakuwang og pailob. May mga pagduda sab nga ang gatosan ka mga pugante gikan sa mga prisohan sa Tacloban ug Abuyog maoy nagpasiugda sa pagpanglungkab ug igo lang nisunod ang gipanggutom nga mga biktima sa bagyo.

Apan karon nagkalig-on ang mga ebidensiya nga dunay mas organisado nga armadong grupo nga nagtinguha paglawgaw sa lapad nga relief operations sa gobyerno ug sa pribadong sektor.

Kansang katuyoan di lang ang pagpangawat ug pagpanulis kon dili ang pagpakauwaw gyod sa kagamhanan ug pagtino nga mas molapad pang kagutom ug pag-antos sa katawhan.

Makapasamot sa kasakit sa mga biktima ni Yolanda ang gikahadlokang pagkabayo sa gubat sa ideyolohiya.

***

Email: [email protected]