Probe ng CHR sa ‘strip search’ sinimulan, 4 special investigator ipinadala sa BuCor

MANILA, Philippines — Nagsimula na kahapon ang pagsisiyasat ng Commission on Human Rights (CHR) sa diumano’y hindi makataong strip search sa mga maybahay ng dalawang political priso­ner sa New Bilibid Prison (NBP), sa Muntinlupa City, ayon sa Bureau of Corrections (BuCor).

Sinabi ni BuCor Director General Gregorio Pio Catapang Jr. na dala ang mission order na may lagda ni Atty. Jasmin Navarro Regino, Director IV Human Rights Protection Cluster, ng apat na CHR investigators na kinilalang sina Atty. Rommel Tinga, SI III Michele Tuliao, SI III Mays Sylvette Rojas at SI II Ma. Milanie Arao.

Nakipag-ugnayan sila kina BuCor Head Executive Assistant, CTC Supt. Fe Marquez; NBP Acting Superintendent, Corrections Chief Insp. Roger Boncales; NBP Maximum Security Camp Commander, Corrections Senior Inspector Abel Ciruela at Corrections Insp. Evangeline Rabara, Chief of Inmate Visitation Service Unit.

Binigyan ng BuCor ang mga tagasiyasat ng briefing at nagsagawa ng simulation ng ipinatutupad na strip cavity search upang bigyan sila ng ideya kung paano tinatanggap ang mga dalaw at pinasilip ang conjugal facilities sa NBP Maximum Camp, pati ang parke para sa mga dalaw ng at kanilang mga anak.

Sinabi naman ng CHR investigators na isu-subpoena nila ang mga lady searcher na sangkot sa reklamo ng strip cavity search at pagsusumitehin ng sinumpaang salaysay ukol sa insidente.

Una nang sina ni Catapang na makiki­pagtulungan sila sa CHR at welcome sa mga rekomendasyon upang mas mapabuti ang ipinatutupad na protocol sa mga dalaw sa persons deprived of liberty (PDLs) sa mga pambansang piitan sa bansa.

Tiniyak pa ni Catapang  sa liham na ipinadala niya kay Focal Commissioner for Prevention on Human Rights, Atty. Faydah Maniri Dumarpa, na kaisa ang BuCor sa layuning itaguyod ang karapatang pantao.