10,821 ka trabaho gitanyag atol sa Tara,Trabaho, G! job fair
CEBU, Philippines — Niabot sa 10,821 ang lokal ug overseas job vacancies nga gitanyag sa 70 ka kompaniya ug recruitment agencies atol sa “Tara, Trabaho, G!” job fair caravan nga gipahigayon sa tulo ka lugar sa Sugbo gikan Nobiyembre 18 hangtud sa 20, 2026.
Si Senate President Sherwin Gatchalian ug Lapu-Lapu City Representative Junard “Ahong” Chan nipadayag sa kamahinungdanon sa pagdala sa mga oportunidad sa trabaho duol sa mga aplikante ilabina sa mga bag-ong gradwado natangtang sa trabaho ug nangita og mas maayong panginabuhian.
Sa iyang mensahe pinaagi sa video atol sa pagbukas sa job fair sa The Outlets at MEZ2 Estates sa Dakbayan sa Lapu-Lapu kagahapon, giawhag ni Gatchalian ang mga aplikante nga pahimuslan ang mga bakanteng trabaho aron makab-ot ang mas lig-on nga kaugmaon alang sa ilang pamilya.
Matud ni Chan nga dako kini nga oportunidad alang sa mga taga-Lapu-Lapu ug sa ubang nangita’g trabaho nga dili na kinahanglan mobiyahe og layo aron makakita og panginabuhian.
Giabi-abi usab niya ang mga aplikante gikan sa ubang siyudad ug lungsod.
Matud ni Paiqah Gaid, hepe sa constituent services sa Office of the Senate President nga nagtanyag ang caravan og 5,576 ka lokal nga trabaho gikan sa 57 ka kompaniya ug 5,245 ka overseas positions pinaagi sa 13 ka recruitment agencies.
Ang ikaduhang job fair ipahigayon sa Carcar City Gymnasium ugma, Nobyembre 19, 2026 diin 18 ka lokal nga kompaniya ang motanyag og 1,852 ka bakante samtang lima ka recruitment agencies ang adunay 1,205 ka overseas openings.
Ang kataposang hugna ipahigayon sa Robinsons Galleria South sa Nobiyembre 20, 2026 nga adunay 2,091 ka lokal nga bakante ug 1,072 ka overseas positions.
Sa unang adlaw sa job fair, 692 ka aplikante ang nagparehistro, diin 72 kanila ang nadawat dayon sa trabaho.
Sa gidaghanon sa mga aplikante, 307 ang nangita og lokal nga trabaho samtang 385 ang nag-aplay alang sa overseas employment.
Matud ni Lapu-Lapu City Public Employment Service Office manager Kim Francisco nga ang tanang partisipante’ng kompaniya adunay akreditasyon ug walay pending nga mga kaso kalabot sa pamuo.
Giawhag usab ni Department of Labor and Employment-7 officer-in-charge Emmanuel Ferrer ang mga employer nga dawaton dayon ang mga aplikanteng kwalipikado ug adunay gikinahanglang kahanas ug dokumento.
Gawas sa pagpangita og trabaho, naghatag usab ang kalihokan og one-stop shop sa mga serbisyo sa gobiyerno lakip niini ang Philippine Statistics Authority, Pag-IBIG Fund ug Social Security System. (BANAT NEWS)
- Latest















