Publiko pinag-iingat sa organ trafficking
MANILA, Philippines — Pinag-iingat ng Inter-Agency Council Against Trafficking (IACAT) ng Department of Justice (DOJ) ang publiko laban sa pagbebenta ng human organ kapalit pera.
Sa isang online post, nagbigay babala ang naturang kagawaran sa panganib na kaakibat ng ganitong uri ng ilegal na gawain. Maituturing aniya itong buwis-buhay.
“Ang organ trafficking ay isang mapanganib at ilegal na gawain kung saan ang mga tao ay nililinlang, pinipilit, o inaabuso para sa pagbebenta ng kanilang mga lamang loob,” saad sa online post ng DOJ-IACAT.
Sa simula, maaaring mukhang mabilis na solusyon ang alok na pera, ngunit ang kapalit nito ay matinding panganib sa kalusugan at maging ang pagkawala ng buhay, ayon pa sa post.
Payo pa ng ahensya, sa halip na ipagpalit sa pera ang kaligtasan, ireport o magsumbong sa kanilang “1343 Actionline against Human Trafficking” kung may nalalaman sa gawain ng sinidkato sa organ trafficking trap.
- Latest
