Pedicab driver, tinaga sa ulo ng buko vendor

MANILA, Philippines — Mistulang ginawang buko ang ulo ng isang pedicab driver nang  tagain ito ng kanyang stepfather matapos  magkaroon ng mainitang pagtatalo kamakalawa ng gabi sa Malabon City.

Nasa kritikal na kondisyon pa rin  sa Tondo Medical Cen­ter  ang biktimang si  Marcelino Austria, 63, ng Brgy. Tugatog, Malabon dahil sa tinamong taga sa ulo at katawan.

Agad namang naaresto ang  amain nito na si Eduardo Aguilar, 72, na isang buko vendor. Narekober sa suspek ang ginamit na bolo sa pananaga.

Lumilitaw sa  report na tinanggap ni Malabon City Police chief, Col. Albert Barot mula kina PSSg Mardelio Osting at PSSg Ernie Baroy na naganap ang insidente dakong alas-7:40 ng gabi .

Nagkaroon ng mainitang  pagtatalo ang  biktima at suspek  hinggil sa pagsasaayos ng  bahay sa  na humantong sa  pananaga ng  huli sa una.

Sa kainitan ng pagtatalo, kumuha ng bolo ang suspek saka pinagtataga sa ulo at katawan ang biktima. Nagawa namang makawala ng biktima sa pananaga at humingi ng  tulong sa Sub Station 2 ng Malabon City.

Sasampahan ng kasong frustrated murder ang suspek.