Sinalakay na online gaming sa Makati, NOGO hindi POGO- PAGCOR
MANILA, Philippines — Nagpasalamat ang Philippine Amusement and Gaming Corporation (PAGCOR) sa pagsalakay sa isang residential building sa Makati City noong Martes sa iligal na online gaming kung saan naaresto ang 63 Chinese nationals at 13 Pinoy na empleyado.
Nilinaw ng PAGCOR na bilang gaming regulator ng bansa, wala silang police power at walang kapangyarihan na umaresto at umusig sa iligal gambling operations.
Pabor din ang PAGCOR sa naging aksiyon ni Representative JB Bernos, Chairperson ng House Committee on Games and Amusements, na nanawagan sa mas masusing imbestigasyon sa proseso ng Philippine Offshore Gaming Operators (POGO) kasunod ng pagkakadiskubre at pagsalakay sa iligal na operasyon ng hindi rehistradong offshore gaming sa Makati City.
Hindi umano POGO ang sinalakay sa Makati City kundi NOGO o non-registered offshore gaming operators at kinokondena ng PAGCOR ang lahat ng iligal na sugal sa bansa, maging land-based o online.
Matatandaan na noong Marso 21, 2019, isang mutual cooperation agreement ang pinasok ng PAGCOR sa Philippine National Police (PNP), National Bureau of Investigation (NBI), Bureau of Immigration (BI) at Office of Cybercrime (OOC) ng Department of Justice (DOJ), kung saan nabuo ang inter-agency council o Task Force na hahawak sa intelligence gathering ng illegal online gambling, centralized information sharing, intelligence operations, surveillance, raids, arrest at prosecution ng illegal online gaming activities.
Ang pagkakadiskubre ng iligal na NOGO operation sa Makati City noong Mayo 5 ay resulta ng concerted inter-agency effort.
- Latest
