DOTR: Walang taas pasahe sa MRT-3, LRT-1 at LRT-2

Kahit tumaas ang presyo ng beep cards

MANILA, Philippines — Kahit tumaas ang presyo ng Beep cards ay hindi naman magtataas ng pamasahe ang Metro Rail Transit Line 3 (MRT-3) at Light Rail Transit Line 1 at 2 (LRT-1 at 2).

Ito ang tiniyak kahapon ng pamunuan ng Department of Transportation (DOTr).

Ayon sa DOTr, ang tinaasan lamang ay ang halaga sa pag-iisyu ng Beep Stored Value Cards at hindi ito magre-reflect sa aktuwal na pasahe ng MRT-3, LRT-1 at LRT-2.

Nauna rito, ang ‘Card Issuance Fee’ para sa Stored Value ‘Beep Card’ ay tinaasan ng mula P20 ay ginawang P30, simula noong Enero 1, 2020, na umani ng batikos sa mga train commuters.

Paglilinaw naman ng DOTr, ang card issuance fee increase ay isang awtomatikong probisyon na nakasaad sa concession agreement na nilagdaan noong Marso 31, 2014, ng noon ay Department of Transportation and Communications (DOTC) at AF Payments Inc.

Nakasaad din umano sa Section 16.5.b ng naturang 2014 agreement na ang Stored Value Card na ipinamamahagi ng Concessionaire hanggang Disyembre 31, 2019 ay icha-charge ng issuance fee na hindi hihigit sa P20, at lahat ng Stored Value Card na ipapamahagi nito matapos ang Disyembre 31, 2019 ay awtomatiko nang magiging P30.

Pagtiyak naman ng DOTr na kasalukuyan na nilang nirerebyu ang naturang concession agreement at lahat ng probisyon nito, upang maprotektahan ang interes ng publiko.

 “We reiterate that there is NO INCREASE in actual FARES of the Light Rail System in the Metro,” dagdag pa nito.