3 miyembro ng ‘Estribo gang’, timbog
MANILA, Philippines – Natimbog na ng mga operatiba ng Quezon City Police District (QCPD) ang tatlong miyembro ng kilabot na ‘Estribo gang’ matapos ang follow up operation isang araw makaraang holdapin ng mga ito ang isang pampasaherong jeepney sa lungsod, iniulat kahapon.
Kinilala ni QCPD Station 9 commander P/Supt. Wilson delos Santos, ang mga suspect na sina Jonas Angustia, 18; Archie Noda, 24; mga residente ng Tumana Marikina City; at Edwin Lim, 22, residente ng Brgy. Silangan San Mateo Rizal.
Ayon kay Supt. Delos Santos, ang mga suspect ang responsable sa panghoholdap sa isang pampasaherong jeep na bumibiyahe sa may kahabaan ng Katipunan Avenue, patungong Marikina fly over, Brgy Loyola Heights sa lungsod.
Aniya nadakip ang mga suspect makaraang magsagawa ng follow-up operation ang kanilang tropa sakay ng mobile patrol car at naispatan ang mga suspect sa nasabi ring lugar habang naghihintay ng kanilang mabibiktima, ganap na alas-11 kamakalawa ng gabi. Dahil dito, agad na kinorner ng mga operatiba ang mga suspect saka inaresto at dinala sa nasabing himpilan.
- Latest
