Dahil sa titig, binata binoga

MANILA, Philippines - Nasa kritikal na kondisyon ang isang binata nang barilin ito sa leeg ng isang mekaniko na nakatitigan nito,  kahapon ng umaga sa Pasay City. Ginagamot sa Pasay City General Hospital (PCGH) ang biktimang si Jason Valenzuela,  26,  ng  Magtibay St.,  Brgy. 134 ng naturang lungsod.

Ang suspek naman na nakilalang si Brian Tan,  32, binata ay pinaghahanap pa ng pulisya.

Naganap ang insidente alas-5:00 ng umaga sa  Tripa De Galina, Brgy. 132, Zone-13 ng nasabing lungsod habang  ang biktima ay naglalakad sa naturang lugar nang makasalubong at makatitigan ang suspek.

Dito na bumunot ng baril ang suspek at  malapitan nitong binaril sa leeg ang biktima at pagkatapos ay mabilis na tumakas. Isang dumaraang rider ang agad na nagmalasakit at tinulungang dalhin sa naturang ospital ang nakahandusay at duguang biktima. Masusing
iniimbestigahan pa ng pulisya ang insidente.