Lady trader utas sa lover
MANILA, Philippines – Patay ang isang 42-anyos na Chinese trader nang barilin ng diumano’y lover nito na nagbaril din sa sarili sa Tondo, Maynila, kahapon ng umaga.
Kinilala ni SPO1 Mario Asilo ng Manila Police District-Homicide Section ang biktimang si Jenny Lu.
Ang biktima ay may-ari ng Lucky Power store na nagbebenta ng glassware at plasticware, na matatagpuan sa Elcano St. sa panulukan ng Claro M. Recto Avenue, Tondo at residente naman ng KP Tower, Elcano St., Binondo ay dead on arrival sa Gat Andres Bonifacio Memorial Medical Center.
Ginagamot din sa nasabing ospital ang suspek na si Benson Uy, isa ring Chinese na nagbaril sa sarili at nagtamo ng tama ng bala ng baril sa dibdib. Naging mababaw lang ang naging tama nito at masuwerteng hindi nahagip ang puso na tumagos sa kili-kili.
Naganap ang insidente dakong alas-9:30 ng umaga sa loob ng Lucky Power store nang dumating umano ang suspek at matapos magsalita ng Chinese ay binaril ang biktima, na sa una ay hindi umano tinamaan pero sa ikalawang putok ay doon ito tinamaan sa tagiliran.
Ayon sa mga tauhan ng biktima, hindi nila naintindihan ang mga sinasabi ng suspect dahil sa salitang Chinese at nang bumulagta na ang kanilang amo ay saka naman nagbaril sa sarili ang suspek.
Sa obserbasyon ng mga tindera, may relasyon ang biktima at suspek dahil madalas magkita at nakikita nilang sabay pang kumain sa nasabing tindahan ang dalawa. Ito’y simula umano nang umalis ang mister ng biktima na umuwi sa bansang China, may 2 buwan na ang nakalipas.
Noong una ay maganda pa umano ang trato sa isa’t-isa hanggang sa makita na nilang nag-aaway ang mga ito.
Posibleng dahil umano sa pagpapa-alam ng biktima na uuwi na rin sa China. Patuloy pa ang ginagawang imbestigasyon ng MPD homicide section sa insidente.
- Latest
