Trike driver itinumba habang namamasada

MANILA, Philippines - Isang tricycle driver ang nasawi nang pagbabarilin ito ng dalawang hindi pa nakilalang mga  suspek kamakalawa sa Caloocan City.

Dead-on-arrival sa Jose Rodriguez Hospital sanhi ng mga tama ng bala sa katawan ang biktimang si Rommel Samiego, 31,  ng Barrio Santo  Cristo, Tala ng naturang lungsod.

Batay sa ulat ng Caloocan City Police naganap ang insidente alas-2:30 ng hapon habang ang biktima ay  nag-aabang ng pasahero  sa  terminal ng mga tricycle  sa may  Saint Benedict St., Admin Site, Tala ng naturang  lungsod nang dumating ang mga suspek na armado ng baril at pinaulanan ng bala ang biktima.

Matapos ang insidente ay tumakas ang mga suspek habang dinala naman ang biktima ng kanyang mga kaanak sa naturang ospital, iniimbestigahan pa ng pulisya ang insidente.