Bus vs kotse: 10 sugatan

MANILA, Philippines - Sampung katao ang na­sugatan makaraang mawalan ng preno ang isang bus at mabundol ang isang Mitsu­bishi Lancer kahapon ng umaga­ sa Quezon City.

Kinilala ni PO2 Henry Gerner Luna, imbestigador ng kaso, ang mga biktimang sina Rebecca Macato, 45; Jesus Alconendas, 50; Rubby Im­perial, 43; Edlyn Sierra, 33; Flor De Liza, 48; Arlene Pregue, 37; Russel Masi­lungan 31; Ronnie de Vera, 25; Daryn Santos, 26; at Robert­ Corpuz, 42.

Samantala, kinilala naman­ ang driver ng bus na si Edwin Carcellar, 33, ng Matabya St., Talanay, Batasan Hills, driver ng Nissan Diesel Bus (PUB) (TYK-498) na nakarehistro sa CEMTrans Service Inc., habang ang driver ng Mitsubishi Lancer (TGQ-113) ay kinilalang si Alfred Rei Cabusora, 32, Unilab Senior Product Manager.

Nangyari ang insidente ganap na alas-9:00 ng umaga sa kahabaan ng EDSA south- bound Lane pababa ng Aurora Tunnel-Immaculate Con­cepcion sa nasabing lungsod.

Ayon kay Luna, bago mang­yari ang insidente, mina­maneho ni Carcellar at ni Cabusora ang kani-kanilang sasakyan sa kahabaan ng EDSA south-bound Lane galing­ sa New York St. patungo sa direksyon ng Makati, nang pagdating sa pababang bahagi ng Aurora Tunnel, biglang nawalan ng kontrol ang bus at gumewang-gewang.

Dahil dito, tinamaan ng bus ang kotse ni Cabusora dahilan para mabangga nito ang isang concrete island, habang ang bus naman ay sumalpok sa poste ng MRT.

Sa lakas ng impact, kapwa nasira ang ilang bahagi ng mga naturang sasakyan, dahilan para magtamo ng mga sugat sa katawan ang mga biktima.

Sa ngayon ay patuloy pa ring iniimbestigahan ng pulisya ang insidente.