Trike driver niratrat, utas

MANILA, Philippines - Isang tricycle driver ang nasawi, habang dalawa pa ang sugatan makaraang ratratin ng dalawang armadong kalalakihan sa lungsod Quezon, iniulat kahapon.

Sa ulat ng Criminal Investigation and Detection Unit ng QCPD, nakilala ang nasawi na si Rommel Cudiamat, 29, ng Park 15 Creekside Brgy. Commonwealth sa lungsod. Habang sugatan naman sina Mariano Roduje, 32; at Ronimel Cudiamat, 38, na kapwa ginagamot ngayon sa East Avenue Medical Center.

Nangyari ang insidente sa may paradahan ng tricycle sa Pilot Drive, Brgy. Commonwealth ganap na ala-1:45 ng hapon sa lungsod.

Sinasabing nakapila ang mga biktima at naghihintay ng mga pasahero nang biglang dumating ang mga suspect lulan ng isang motorsiklo at bigla na lamang pinaulanan ng bala ang mga una.

Samantala, droga naman ang tinitingnan ng mga awtoridad na sanhi ng pamamaril dahil ang nasawi umanong si Cudiamat ay dati nang nakulong sa Urdaneta, Pangasinan kung saan apat na buwan pa lamang nakakalaya dahil sa umano’y pagbebenta nito ng ilegal na droga.