Drug operation: Vendor dedo, 1 sugatan
MANILA, Philippines - Nasawi ang isang 23-anyos na vendor habang sugatan naman ang isa pa matapos na tamaan ng ligaw na bala mula sa mga operatiba ng Special Anti-Illegal Drug – Special Operation Task Group (SAID-SOTG) na nagsasagawa ng drug operation sa Mandaluyong City kamakalawa ng hapon.
Napuruhan sa noo si Santiago Bose ng 55 Block 4, Welfareville Compound sa Barangay Addition Hills, Mandaluyong City habang tinamaan ng bala sa kaliwang bahagi ng likod si Ramon Velacruz, 33, vendor, ng #429 Guyabano St., Pasig City.
Nasa custody ng Mandaluyong City PNP ang responsable sa insidente na sina PO3 Julius Visperas at PO1 Carlito Reguirre na kapwa nakatalaga sa SAID-SOTG ng Mandaluyong City PNP kung saan patuloy na tinutugis si SPO2 Jose Drexell Molina.
Sa inisyal na report na isinumite kay P/Senior Supt. Armando Bolalin, hepe ng Mandaluyong City PNP, lumilitaw na nagsagawa ng drug operation sa Welfareville Compound ang mga pulis upang arestuhin si Anthony “Kirat” Vivero, 27.
Sinasabing inaaresto na ng mga pulis si Kirat nang tangkain nitong agawin ang baril ni PO3 Visperas, kung saan inulan sila ng mga bato at bote mula sa mga residente kaya napilitan magpaputok ng baril ang mga pulis.
Dahil naman sa putukan ay lumabas ng bahay si Bose at niyakap ang dalawang pamangkin kung saan tinamaan ng ligaw na bala sa noo.
Si Velacruz naman ay kasalukuyang nakikipag-inuman sa mga kaibigan nang tamaan ng ligaw na bala.
Kaugnay nito, tiniyak naman ni Bolalin na walang magaganap na whitewash sa imbestigasyon kung saan dinisarmahan na rin ang mga pulis.
- Latest
- Trending