Stude binugbog muna bago hinoldap

MANILA, Philippines - Binugbog muna bago hinoldap ang isang 16-anyos na high school student ng tatlong kalalakihan kamakalawa ng gabi sa Caloocan City. Nakilala ang biktima na si Aldrin John Salvador, estudyante sa hindi nabanggit na paaralan, ng Macabagdal St., ng nasabing siyudad.

Samantala, ang isa sa tatlong suspek ay nadakip ng pulisya na nakilalang si Aldrin Gallardo 21, isa ring estudyante kung saan bugbog sarado rin ito matapos kuyugin at pagtulungang gulpihin ng taumbayan. Pinaghahanap naman ang dalawa pang kasamahan nito na si Patrick Cuaton at isa pang hindi kinilala.

Naganap ang insidente dakong alas-9:00 ng gabi sa kahabaan ng Bustamante St., Bagong Barrio habang naglalakad ang biktima sa nabanggit na lugar papauwi ng kanilang bahay nang bigla itong harangin ng mga suspek at pagtulungang   gulpihin at saka hinoldap.       

Mabilis na sumaklolo ang ilang residente hanggang sa hinabol ng mga ito ang mga holdaper at naabutan nga si Gallardo, kung kaya’t kinuyog at ginulpi ito.