QC mananatiling pinakamayamang lungsod Bistek

MANILA, Philippines –  Naniniwala si Quezon City Mayor Herbert M. Bau­tista na mapapanatili niyang pinakamayaman ang lungsod ngayong taon.

Ito’y matapos na ma­iulat ni City Treasurer Edgar Villa­nueva na naka­kolekta ang siyu­dad ng P11,417,725,743.15 mula sa mga naging bayarin sa city government noong 2010. Kabilang na rito ang P1,723,200,007.89 kabuuang trust fund.

Mas mataas ng 3.76 porsiyento o P413,582,743.15 ang naturang koleksyon kung ihahambing sa inaasahang makokolekta ng pamahalaang lokal.

Ayon pa kay Villanueva, nakapagtala rin ang City Treasurer’s Office (CTO) ng 2.91 porsiyento o P274,525,735.26 sobra sa general fund ng siyudad na mayroong kabuuang halaga na P9,694,525,735.26 sa pagtatapos ng 2010.

Isa sa mga naging da­hilan ng paglaki ng kolek­syon ng pamahalaang lungsod ang P30-milyon na pa­unang bayad ng Metro­politan Water­works and Sewerage System (MWSS) para sa kanilang P270-milyon real property tax obligation.

Nitong Enero 4, 2011, nasa P4.006 bilyon na ang pondo na maaaring magamit para sa mga prayoridad na programa at proyekto ni Bautista.