AFP-NCRC0M red alert na hanggang Bagong Taon
MANILA, Philippines - Upang matiyak ang seguridad at mapayapang selebrasyon, pinalawig pa ng AFP-National Capital Region Command (AFP-NCRCOM) ang red alert status nito hanggang sa pagsalubong sa Bagong Taon.
Ayon kay AFP-NCRCOM Spokesman Lt. Col. Armand Rico, ipinag-utos ni AFP-NCRCOM Chief Major Gen. Arthur Tabaquero sa idineploy na tropa ng mga sundalo na paigtingin pa ang pagbabantay sa Metro Manila katuwang ng puwersa ng National Capital Region Police Office (NCRPO).
Sa kabila nito, kumambyo naman si Rico sa pagsasabing walang kinalaman sa travel warning ng anim na bansa ang pagpapalawig pa ng red alert status ng AFP-NCRCOM.
Una nang nagbabala ang ilang bansa na may matinding ‘terror threat ‘ sa Pilipinas partikular na sa Metro Manila kung saan isa sa mga target pasabugin ng Jemaah Islamiyah terrorist at ng kaalyado nitong mga bandidong Abu Sayyaf ang San Juan City.
Sa kasalukuyan, ayon sa opisyal ay patuloy ang kanilang beripikasyon hinggil sa sinasabing banta ng terorismo at posibleng mga nakapuslit umanong terorista sa Metro Manila.
- Latest
- Trending