Cartographic sketch ng 2 sa 'Bundol Gang', inilabas ng PNP

MANILA, Philippines - Inilabas kahapon ng East­ern Police District (EPD) ang mga “cartographic sketch” ng dalawang hinihinalang mi­yembro ng bagong sindi­katong tinawag na “Bundol Gang” na nambibiktima ng mga OFWs, balikbayan at mga turista na dumarating sa bansa.   

Inilarawan ang unang sus­pek na nasa pagitan ng edad na 40-45 anyos, may taas na 5’10’’-6 feet, matipuno ang katawan, kayumanggi at na­ka­suot ng de-kulay na jacket na may hood at itim na pantalon. 

Sangkot ito sa panghohol­dap at pagtangay ng sasak­yan ng negosyanteng si Jorge Bernas, bayaw ni dating Pre­sidential daughter Luli Arroyo noong Hunyo 19 sa Pasig City.

Nasa pagitan ng edad na 28-35 anyos naman ang ika­lawang suspek, may taas na 5’7’’-5’9’’, katamtaman ang katawan, maputi, at nakasuot ng t-shirt at shorts.

Kabilang naman ito sa nambiktima sa American national na si Frederick Allan Boutcher, 62, sa EDSA-Shaw underpass sa Mandaluyong City nitong Hulyo 16.              

Nagbabala naman si EPD director Chief Supt. Francisco Manalo sa mga lumalapag sa Ninoy Aquino International Airport (NAIA) na maging ma­pagmatyag sa mga sumu­sunod sa kanila buhat sa paliparan upang hindi mabik­tima ng sindikato. Modus-operandi ng grupo ang pag-aabang ng mga OFW, balik­bayan o turista na may dalang malaking halaga buhat sa airport, susundan, at bubun­dulin sa likuran ang sasakyan pagdating sa alanganing lugar kung saan dito magdedeklara ng holdap. Sinabi pa ni Ma­nalo na karaniwang nag-ooperate ang sindikato ng apat hang­gang limang miyem­bro na armado ng mga handguns at maging carbine rifle. 

Naniniwala rin ang pulisya na may kasabwat ang sindi­kato sa mga tauhan ng air­ports na nagbibigay ng tip sa kanila kung sinong pasa­hero ng eroplano ang may dalang malaking halaga ng salapi sa kanilang bagahe. Nabatid na nakapambiktima na rin ang sindikato sa Pasay City at Maynila.