Naaagnas na bangkay ng dalagita, nadiskubre
MANILA, Philippines - Isang bangkay ng dalagita na may tama ng saksak sa katawan at mukha ang nadiskubre sa isang madamong bahagi ng bakanteng lote sa lungsod Quezon kamakalawa.
Nakilala ang biktima na si Zaida Jane Francisco, 17, out of school youth at residente ng Gloria St., Brgy. Gulod sa lungsod.
Pasado alas-6 ng gabi nang matagpuan ang katawan ng biktima ng residenteng si Erwin Mocorro habang nakahandusay ito sa bakanteng lote ng Golden HOA compound, Florentina St., Brgy. Gulod.
Sa panayam sa ina ng biktima na si Jenny Francisco, bago natagpuang bangkay ang anak, umalis ito ng kanilang bahay kasama ang isang Rica Mae Magayaga, 14, noong May 13, 2010 ganap na alas-6 ng gabi.
Inaalam pa ng pulisya kung ginahasa muna bago pinaslang ang biktima. Patuloy namang inaalam ang posibleng motibo sa krimen.
- Latest
- Trending
