13 anyos patay sa kaklase

Isang 13-anyos na high school student ang iniulat na nasawi makaraang makipagsuntukan sa kanyang 14-anyos na kaklase sa loob ng compound ng kanilang paaralan sa Sampaloc, Maynila.

Kinilala ni Det. Edison Bertoldo ng WPD ang nasawi na si Johndrel Alcantara. Patay na ito nang idating sa Chinese General Hospital.

Base sa inisyal na ulat ng pagamutan, heart failure ang naging dahilan ng kamatayan nito.

Walang nakitang anumang external injury sa katawan nito.

Base sa imbestigasyon nagkaroon umano ng pakikipaglaban si Alcantara sa kaklase nito sa loob ng Esteban Abada High School na nasa Blumentritt Extension sa Sampaloc, Maynila dakong alas-8:40 ng umaga.

Binanggit pa ng nakalaban ng biktima na ito ang unang umupak sa kanya at paganti na sana siya ng makita niyang biglang nanigas si Alcantara at naghabol ng hininga.

Mabilis na isinugod sa pagamutan ang biktima subalit hindi na ito umabot pang buhay.

Kapwa pinatawag ng schools officials ang mga magulang ng magkaklase na nagkasundo na lamang sa pangyayari.

Sasagutin ng magulang ng nakalaban ni Alcantara ang ospital at burial expenses ng biktima. (Ulat ni Nestor Etolle)