13-anyos dinukot halinhinang hinalay ng 4

Isang 13-anyos na dalagita ang halinhinang ginahasa ng apat na kalalakihan sa likod ng isang paaralan, kamakalawa ng madaling araw sa Quezon City.

Hubo’t hubad at itinali pa ang mga kamay at paa ng biktimang itinago sa pangalang Lisa, ng Balic-Balic, Sampaloc, nang matagpuan ito ng ilang residente sa isang maputik na lugar sa likod ng Batasan Hills Elementary School dakong alas-2:30 ng madaling araw.

Sa isinagawang follow-up operation ng CPD Station 6, agad namang nadakip ang apat na suspect na sina Berlito Modar, 25; Aldrin Pondevilla, 16; Abraham Daez, 18 at Raymund Matias.

Ang mga ito ay positibong kinilala ng biktima na umano’y dumukot at gumahasa sa kanya.

Base sa ulat, dinukot ng mga suspect sa labas ng kanilang bahay sa Sampaloc ang biktima bago ito dinala sa may Batasan Hills at doon halinhinang ginahasa. (Ulat ni Jhay Mejias)