Obiena hari pa rin ng Asiad Pole Vault

MANILA, Philippines — Nilundag ni pole vaulter EJ Obiena ang kanyang ikalawang sunod na gold medal, habang isang silver mula sa sepak takraw at tig-isang bronze sa women’s 800-meter run at sa surfing ang nasikwat ng Team Philippines sa 20th Asian Games kahapon sa Aichi-Nagoya, Japan.

Itinala ni Obiena ang bagong Asiad record na 5.91-meters para patuloy na dominahin ang men’s pole vault event ng athletics competition.

Ang two-time Olympian din ang nagtala ng bagong markang 5.90m sa 2022 Asiad sa Hangzhou, China para sa una niyang gintong medalya sa quadrennial event.

Bago ito ay itinakbo muna ni Fil-Am middle distance runner Victoria Bossong ang tanso sa women’s 800m run sa kanyang bilis na 2:05.34.

Ito ang ikatlong medalya ng Philippine athletics team sa Aichi-Nagoya Asiad matapos ang tanso ni Fil-Spanish John Cabang Tolentino sa men’s 110-meter hurdles.

Nagkasya naman sa pilak sina Nelly Jay Salon, Jean Marie Sucalit at Abegail Sinogbuhan matapos ang 8-15, 4-15 kabiguan kina Nguyen Thi Khanh Ly, Le Thi Hong Lien at Nguyen Thi Thu Trang ng Vietnam sa sepak takraw women’s double finals.

Ang women’s double silver ang highest finish ng bansa sa sepak takraw event na idinagdag sa Asian Games noong 1990.

Sa surfing, nilangoy ni Jayuard Alciso ang bronze matapos magtala ng 11.64 points laban sa kanyang kababayang si Toby Espejon (8.90) sa isang All-Filipino match sa men’s shortboard event.

Lumobo na sa tatlong golds, kasama ang dalawa ni gymnast Carlos Edriel Yulo, ang nakuha ng Pilipinas sa Aichi-Nagoya Asiad bukod sa tatlong silvers at 12 bronzes.

Sa athletics, pang-anim sina Anfernee Lopena, Kristina Knott, Neil Catral at Jessica Laurance (42.20) sa mixed 4x100m relay at pang-pito sina Michael del Prado, Hussein Lora?, Frederick Ramirez at Jazzpeer Arcenal (03:12.24) sa men’s 4x400-meter relay.

Sa boxing, susuntok ng finals ticket si 2020 Tokyo Olympics silver medalist Carlo Paalam sa pagsagupa kay 2025 world champion Makhmud Sabyrkhan ng Kazakhstan sa men’s 55kg semis match.

Sa men’s indoor volleyball, bagsak ang Alas Pilipinas Men sa Chinese Taipei, 25-21, 20-25, 17-25, 27-29, para sa kanilang 0-3 baraha sa Pool D at babagsak sa classification round.