Mga aninipot sa kasingkasing

Dinhi sa may kiliran sa bungtod dunay kahoy nga lomboy ug matag abot sa ting-init magpunsisok ang bunga niini. Ug anhi sila si Bidong ug Anita magpalabay sa mga takna. Kausa gigakos ni Bidong si Anita ug gihagkan ang mga ngabil.

Mibawos pud ang dalaga paggakos ug nagpaabot na lang kun unsay sunod nga buhaton sa ulitawo. Apan wala gyud buhata ni Bidong ang buhat nga buhaton lamang sa magtiayon kay dili siya gusto nga yanoyanohon lang niya ang iyang hinigugma.

Pagkakaron kutob lang una sa hawokhawok ug gakosgakos ug ning ilang pagpanuroy karon sa ilang abotanan hiabtan sila'g kagabhion. Ug kay kilomkilom na mihana og tindog si Anita aron manglakaw na sila apan kalit siyang mihangadhangad kay maoy iyang nakita ang daghang mga aninipot nga naglibotlibot sa kahoy'ng lomboy.

"Bidong, nindota nila no nagkidlapkidlap sila nga naglibotlibot sa dakong punoan sa lomboy," nahimuot si Anita.

"Oo, ug matud pa sa mga karaang tawo kun duna gani mga aninipot nagkahulogan kana'g kahayag sa kinabuhi ug nanghinaot ko, Nits sila maoy saksi sa atong gugma ug kay mga aninipot man sila mga insekto sa kinaiyahan nga may kahayag nga gidaladala sama sa atong gugma. Duna kini nindot kaayong umaabot ug ikaw dili gyud malimot kanako..." Ug nanindog silang duha ug hinayhinay nga namiya sa kahoy sa bungtod.

Karon wala na ang kahoy kay giputol sa tag-iya sa yuta ug si Anita wala na pud dinhi sa ilang balangay. Miadto kini sa laing nasud -- didto sa Dubai. Ug si Bidong naordinahan gyud sa pagkapari human sa daghang katuigan sa iyang pagsulod sa seminaryo. Domingo human sa iyang pagmisa, may miduol kaniyang babaye. Naghilak kini ug nakaila siya. "Anita, ikaw kini," ni Bidong nga gibati'g kaluoy sa kanhing hinigugma.

"Wa man kita magkadayon pero ikaw ang aninipot sa akong kalibotan ug tungod ning nahitabo nako ug kanimo dili na ko magminyo pa," ug mikupot si Anita sa kamot ni Bidong. (Kataposan)