Bayad sa taksi nga wa sakyi
Alas 7:00 sa bunta’g. Humana’g kaligo si Keno. Nakailis na’g uniporme ug gusto na siyang molakaw. Apan wala pa moabot ang taksi nga iyang gitawagan sa telepono.
Sudlonon ang ilang balay. Tungason pa gyud kay naa man mahimutang sa Puntod Hills Subd. Hinungdan, nga tagsa ray taksi ang mosulod dinhi.
Gitan-aw’g usab ni Keno iyang relo. Alas 7:15 na. Hapit na mo-alas 8:00 ang oras nga dapat atua na siya sa iyang trabahoan. Kay kun ma-late siya niining adlawa, anugon ang P20T-No Late, No Absent Incentive nga gitagana sa ilang kompaniya niadtong mga empleyado, kinsa di gyud mopalta ug ma-late sa ilang eskedyul.
Misugod na’g butokbutok ang dughan ni Keno. Nganong wa pa man kaha ang taksing iyang gihayir? May nahitabo kaha? Ania na siya sa ilang gate, daplin sa dalan ... taudtaod nang nagpaabot. Pastilan, kun molabay pa ang 5 minutos unya di gihapon siya kasakay, ma-late na gyud si Keno.
Unya, kalit lang may sakyanan nga miagi sa iyang tungod -- yellow cab taxi. Iya kining gipara. Bahala na’g di ni mao ang gikasabot niyang taksi. Ang importante nga makaabot lang siya sa tukmang oras sa ilang trabahoan.
Miatras ang yellow cab ug mihunong sa iyang nahimutangan. Apan una siya mosakay, gitawag niya si Daday, iyang anak dalaga ug gibinla’g tibuok P100.
“Unsaon man ni nako, Tay?” Sa anak pa nga nahibulong.
“Ingkaso moanhi tong taksi nga Eagle 747 itunol na sa drayber. Ingna siya nga misakay na lang ko’g lain kay dugay man siyang naabot.”
“Unya, alkanse ka, Tay?” Sa anak nga wa makasabot sa gibuhat sa amahan.
“Ayyy, basta ... itunol lang kana!” ni Keno pa nga ning tungora maayo nang pagkahimutang sulod sa yellow cab taxi. Dayon, iyang gimandaran ang drayber:
“Bay, paspas lang ta, ha, kay may giapas kong oras.”
Tuod man, gituman sa drayber ang hangyo ni Keno. Misirit lang ang agi sa naghaguros nga sakyanan paingon sa ilang destinasyon.
Nakadawat gyud si Keno sa iyang P20T nga incentive. Ug usab, namatikdan sa mga anak nga human niadtong gibuhat sa ilang Tatay, kada tawag nila’g taksi sa higayon nga sila nanginahanglan, muabot gilayon kini sa ilang balay. (Kataposan)
- Latest
