Unos sa kapalaran

Wala gayud makasabot si Maribel sa iyang gibati dihang nagkauban na sila si Ernest. Mora’g gihakop ang iyang kasing-kasing sa tuman nga kalipay nga nakauban niya ang namingawan niya nga si Ernest.

Karon nga nanguyab na kaniya si Ernest, wala masayod si Maribel kun unsay iyang buhaton. Igo lang siya nga nagpahiyom nga motutok panagsa sa ambongan nga salesman. “May paglaom ba ang akong gugma kanimo Mar?” gisukna na siya ni Ernest.

Ingon sa wala mahimutang si Maribel. Nagsagol ang kalipay ug kakulba nga iyang gibati. “Ambot ba uy, wala ko makasabot sa akong gibati. Kadto bitaw nga wala ka na moadto sa department store Ern, gibati nako nga gimingaw ko nimo,” wala ikauwaw ni Maribel ang pagtug-an.

“Kun mao kana, may pagbati ka usab diay kanako Mar. Sige na, sugta na ko,” matud ni Ernest nga ingon sa pilit na kaayo’g tinan-awan kang Maribel. “I love you Mar. Sige na ingna ko nga you love me too,” ni Ernest. Tuod, wala g’yud sipyata ni Maribel si Ernest. Gidawat niya ang gugma nga gihalad sa ulitawo. “Salamat Mar, I’ll promise that I will be true to you. Dili ko magluib sa atong gugma ug ikaw ang akong dad-on sa altar ug isaad sa Ginoo nga mahalon ko ikaw sa tibuok ko nga  kinabuhi,” pasalig ni Ernest.

Ingon sa nalukmay pag-ayo si Maribel nga nakadungog sa mao nga mga pulong sa pasalig gikan ni Ernest. “Akong lauman Ern nga dili mo ako pahilakon,” ni Maribel nga mipig-it sa bukton sa ulitawo. Gikan niadto, kanunay na sila nga mag-uban kay kun anaa si Ernest sa Davao, kuhaon gayud niya si Maribel ug ihatod sa pagpauli sa ilang balay sa Panabo District. Nagpaila si Ernest sa mga ginikanan ni Maribel. Diha matugkad ni Maribel nga matinud-anon g’yud kaayo si Ernest sa iyang gugma kay wala man kini mauwaw sa pakigsuod sa iyang mga ginikanan.

Nanglabay ang mga matam-is nga adlaw sa ilang pagminahalay ni Ernest ug Maribel. (Sumpayan)