Anino likod sa luha sa Kapitan

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Sa unang adlaw sa imbestigasyon, wa kapugngi ang pagpangahulog sa mga luha ni Kapitan Rolito Gilo sa cargo ship, Sulpicio Express Siete. Naluoy siya sa mga pasaherong nanglutaw nga patay na ug sa wala gyud makagawas sa barko, kinsa pag-ugkat niini sa mga rescuers, baho na!

Mao kaha kini ang tinuoray’ng rason sa iyang paghilak? Or, may laing hinungdan nga gitagoan niya pag-ayo ilawom sa iyang dughan? Wala kaha siya magpahilakhilak aron matakpan sa iyang mga luha ang tinuod ug maoy ipagawas ang bakak?

Naluoy man diay siya sa mga pasahero, nganong iya mang gisungay ang MV St. Thomas Aquinas nga maoy gisakyan sa daghang inosente nga naalaot? Makapahibulong! Di, ba? Kay ang gimaneho baya niyang barko ang nahimong kriminal sa maong trahedya. Hibawo man diay siya nga gatosan ka kinabuhi ang karga sa maong barko, unya nganong iya mang gibuslotan ang kilid? Tan-awa, oh...di nakonsensiya nuon siya. Unsaon, may lain mang kapitan sa barko ang nakakita nga wala siya mosubay sa hustong agianan, nagpaugat man siya’g pangilog! Sa inbound man siya moagi, imbes sa outbound. Unya, mao nay naluoy?

Ginaingon: “The truth will set you free.” So, no matter how truth hurts, just tell the truth, Kap! Sa imong kadanghag, sad-an na man ka daan. Busa, ayaw pun-i pinaagi sa pagpamakak. Kay mosamot lang kahasol ang imong konsensiya. Kun sa pagpamakak modaug ka dinhi sa timbangan sa yuta, apan didto sa langit di gyud ka makalusot. Wala’y binuang nga gibuhat nato dinhi sa kalibotan nga dili makita sa atong Ginoo.

Gani, dihang may pasahero sa barko nga nangutana: “Lord, diyotay ra ba ang maluwas?” Mitubag ang Ginoo: “Buhata ang kutob sa imong mahimo aron ka makaagi sa hagip-ot nga pultahan. Sultian tikaw nga daghan ang misulay apan wala gyu’y nakasulod sa gingharian sa Diyos.”

Unsa na kaha kun maoy puy-an ta pirme ang pagpamakak? Ablihan kaha kita sa Ginoo kun manuktok ta sa iyang pultahan? Segurado gayod nga moingon Siya: “Wala ko masayod kun diin mo gikan. Palayo kamo kanako kamong mga dautan.” Paita! Di gyud diay ta makasulod sa langit kun kita magpaulipon sa pagpamakak.

Busa, Kap, aron dili tulisokon sa tanlag imong konsensiya, tug-an sa tinuod. Ayaw paghilakhilak. Kay may mga masuhirong mata nga maayo kaayong mosubay unsa ang anino nga nagpahipi luyo sa imong mga luha. Ilang mahibaw-an kon may script ka bang gisunod, o ang aktuwal ba gyud nga hitabo maoy imong giyagyag? Busa, anaa ra gyud nimo ang pagpili: Ang sugo sa Ginoo, o ang sugyot sa demonyo?