Manggiulawon - Gula 4

Isog kaayo og tinan-awan ang lalaki nga kauban ni Karlyn ngadto kang Jerson. Miduko si Jerson kay wala siya makaharong pagtan-aw sa hait kaayo nga pagtutok kaniya sa maong lalaki.

“Manny, meet my friend, si Jerson... and Jerson he is Manny, my classmate,” gipaila-ila  ni Karlyn sila Jerson ug Manny. Mitindog si Jerson ug gitunol ang tuo niyang kamot ngadto kang Manny apan wala kini dawata.

Nauwaw si Jerson mao nga mibalik siya paglingkod. “Dili diay madayon ang atong lunch date kay may kauban ka man diay,” giingnan ni Jerson si Karlyn. Wala na motingog si Karlyn apan milingkod kini atbang kang Jerson.

“Dili ka g’yud diay mouban kanako sa lamesa?” giingnan ni Manny si Karlyn. “Giingnan ko na ikaw nga aduna ko’y kasabot nga magdungan mi’g lunch,” matud sa dalaga nga milingiw.

Nagbilin og hait nga tinan-awan si Manny sa wala pa mobiya sa lamesa nila ni Jerson ug Karlyn. Nakapanglingo-lingo si Jerson nga naghuna-huna kay nalantawan na niya ang umaabot nga panghitabo kun magpadayon siya sa iyang tinguha ni Karlyn.

“Sori kaayo Jerson ha sa gipakitang batasan ni Manny. Ambot nganong ingon niadto ang iyang batasan nga wala man kami relasyon,” ni Karlyn pa nga milantaw sa gawas sa canteen kun anaa pa ba si Manny. Nag-order sila og makaon. Mibalik ang ilang panagsuod ug giingnan ni Jerson si Karlyn nga iya kining kuhaon human sa ilang klase.

Pagkagabii, didto na nagpaabot si Jerson gawas sa classroom nila ni Karlyn. Naghinam-hinam siya nga magkauban na usab sila pag-usab. Apan napasiga ang iyang mga mata kay dihang migawas na si Karlyn, kauban na usab niya si Manny.

Gigil-asan kaayo si Jerson. Nag-ukon-ukon siya kun magpakita ba kang Karlyn kay wala pa kini makakita kaniya nga nasalipdan sa daghang mga tinun-an. Apan si Karlyn maoy unang nakakita kaniya.

“Hi Jerson, tana,” miduol si Karlyn kang Jerson ug migunit dayon sa iyang bukton. Diha sa luyo niini si Manny. “Ikaw na ‘sab! Gihagit g’yud ko nimo,” nagpaminti sa kasuko si Manny nga milakaw.

Nasagmuyo kaayo si Jerson nga naghuna-huna sa nahitabo nga pagbahad kaniya ni Manny. Nakapanghupaw siya apan giagda na siya ni Karlyn nga manglakaw. “Gahi g’yud og ulo kadto si Manny. Bisan wala ko’y gusto kaniya dili mopatoo,” matud ni Karlyn. Sa boarding house ni Karlyn nakahigayon si Jerson sa pagpangumusta sa dalaga kun aduna ba siya’y paglaum sa gihalad niya’ng gugma. “Bitaw, dili na ko magpaliko-liko pa Jerson, I miss also and I love you.”

Daw nagyapa-yapa sa kalipay ang kasing-kasing ni Jerson apan sa luyo niini nagpahipi usab ang kabalaka sa umaabot nga panghitabo. - Sumpayan