Pahiyom ni Charisse

Gula 2

Gusto ni Marco nga iya g’yud nga masuod si Charisse. Gihuna-huna ni Marco kun kinsa nga artista nga susama’g panagway ni Charisse.

Sa una pa lang pagkakita ni Marco kang Charisse kaganina nga nagpaabot og iyang kasakyan, gitutokan niya kini pag-ayo ug wala gayud siya masayop – gwapa g’yud kini kaayo.

Dili kaayo taas si Charisse apan ang panagway dili na malalis ang iyang kaanyag. “Mag-unsa ka diay sa Taptap,” nangutana si Charisse.

Dali kaayo nakapangita’g tubag si Marco. “Duna mi seminar sa among kompaniya ug tan-awon nako ang training center sa Taptap kun haum ba para venue.”

“Unsa diay imong trabaho Marc?” laing pangutana ni Charisse. Gitug-anan ni Marco nga usa siya ka superbisor sa usa ka kompaniya nga tigbaligya og mga kotse.

Mitug-an si Charisse nga igo lang siya nakahuman sa high school ug wala na makatungha sa koleheyo. “Yuna, duol na ta sa amo, kanang tindahan daplin sa karsada amo na,” matud ni Charisse.

Gihunong ni Marco ang kotse atubangan sa tindahan. Sa wala pa mogawas si Charisse. “Dali hapit usa, ari maniudto kay dali ra man lutoon ning akong kinompra,” giingnan ni Charisse si Marco.

Wala dayon motubag si Marco. Igo lang siya nga mipahiyom ug gitagbaw ang iyang mga mata sa pagtutok sa kaanyag ni Charisse.

“Dali na gud, hapit usa kadiyot sa among pinobre nga balay,” daw dili gayud magpabalibad si Charisse. Bisan og daku’g gusto si Marco nga mohapit sa balay ni Charisse, nagpakaaron-ingnon siya nga kunohay nagdali siya.

Apan taud-taud. “Sigi mohapit na lang ko kay para ‘sab makakita ko sa view dinhi sa inyong lugar Char,” matud ni Marco.

Ang inahan ni Charisse ang nagluto sa ilang pagkaon ug nagkalingaw lang pagsultianay ang dalaga ug si Marco. “Anogon nga wala ka mopadayon sa pagtungha Char, tabangan tika nga maka-avail sa college scholarship sa Cebu City,” ni Marco pa.

Daw naikag si Charisse nga nakadungog nga tabangan siya ni Marco aron makapadayon pagtungha pinaagi sa pag-avail sa scholarship program sa siyudad.

“Gawas nga may scholarship program ang dakbayan, duna pay gitagana nga kapuy-an sa mga nagpuyo sa mountain barangay og P300 ra ang bayad,” pasabot ni Marco.

“Sigi baya ha? Tabangi ko nga makapadayon pagtungha karong June?” nagpahiyom si Charisse nga sa unang higayon migunit sa bukton ni Marco.

Dali kaayo nga nakapasalig si Marco kang Charisse nga iyang tabangan. “Sigi, unya sa Lunes sugdan nato sa pag-process ang imong papeles, atong adtoon si Dr. Rhea Mar Angtud ug si Mayor Rama,” ni Marco pa. – (Sumpayan)