Ang Sugbo karon ug ugma

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Magsaulog sa ika-443 ka tuig nga founding anniversary ang lalawigan sa Sugbo sa Agosto 6 niining bulan sa Agosto nga maoy hinungdan nga niadtong unang adlaw sa maong bulan kon Agosto maoy gihimo ang pagbukas sa gihan-ay nga lainlaing kalihokan nga gipasiugdahan sa kagamhanan sa maong lalawigan.

Si Gobernador Gwendolyn Garcia maoy nangulo sa pagbukas sa kalihokan nga gitambongan usab sa mga mayor sa kalungsoran, mga opisyal sa kagamhanan ug sa sektor sa mga magpapatigayon dinhi sa lalawigan.

Matud pa nila nga niining maong adlaw sa pagsaulog sa kasumaran sa pagkahimugso sa lalawigan sa Sugbo maoy makapahinumdom kun unsa ang Sugbo kaniadto, karon ug sa umaabot pa nga katuigan.

Daghan ang nag-ingon nga ang lalawigan sa Sugbo maoy nahimong pinuy-anan sa minilyon ka gidaghanon nga mga Sugbuanon nga mahigugmaon sa kahapsay ug kalinaw.

Ang paningkamot sa gitinguhang kalamboan kanunay nga gipasikad sa hugot nga pagtuo sa atong Labaw nga Makagagahom nga maoy magadan-ag sa pagbaklay sa dalan nga mangiob.

Gitataw nila nga ang mga nagdumala sa nagkadaiyang buhatan sa atong lokal nga kagamhanan sa matag dakbayan ug kalungsoran mga lumalabay lamang sama sa katawhan nga nagpakabuhi ubos sa landong sa demokratikanhong kagamhanan.

Sa ilang paglabay maoy magpabilin ang ilang gikatampo nga kalamboan nga maisip nga bililhong kabilin nga mahandom sa mosunod pa nga kaliwatan.

Dugang pa nila nga sa matag lawig sa daghang katuigan maoy ilang namatikdan ang daghan nga mga kausaban sa kahimtang ug ingon man ang matag adlaw nga mga lihok sa katawhan nga nagpakabuhi nga malinawon.

Naglakip sa mga kausaban nga dayag kaayo nga natagamtam sa katawhan mao ang paspas nga dagan sa mga sakyanan nga nagbiyahe sa kalungsoran ug mga dakbayan nga nagtimaan usab sa paspas nga kalamboan sa umaabot pa nga katuigan.