Habal habal

Gula 6

Kalit lang mihuros ang bugnaw kaayong hangin. Napalid ang mga buhok sa Koreana ngadto sa nawong ni Efren. Nasimhot sa ulitawo ang kahumot sa buhok ni Leng.

“Very cold,” matud ni Leng sa tingog nga daw nagkuray sa katugnaw. Gigakus ni Efren si Leng. Unang higayon nga nagdip-igay ang masi’g nila ka lawas. Misamot ang gibati nga kainit sa kalawasan ni Efren.

Samtang nagtupad sila paglingkod, hinay niya nga gigabling si Leng aron mosandig kini sa iyang dughan. Dungan nga milingi si Leng kang Efren ug diha-diha nagtagbo ang masi’g nila ka mga ngabil.

Katam-is sa unang hawok nga natagamtaman ni Efren gikan sa Koreana. Lahi si Leng sa ubang Koreana. Samtang pikoton og gamay ang iyang mata apan daw mora lang gani siya’g Filipina nga tan-awon.

Nagparayganay silang duha sulod niadtong daw kweba didto sa TOPS. Taud-taud, nakita niya nga ang mga higala nga Koreana ni Leng, paingon na nga mogawas sa TOPS.

“Let’s go,” giingnan ni Efren si Leng. “No we will just let them go ahead,” matud sa Koreana nga daw nagkayungit pagsulti’g ininglis. Giparaygan pag-usab ni Efren si Leng ug nagka-init na pag-ayo ang ilang pagparayganay.

Diha pa masayri ni Efren nga uhaw diay og pagpangga si Leng. Agresibo usab kaayo si Efren kay una pa kini nga higayon nga nakaparayeg siya og langyaw nga babaye.

Dunay iyang higala kaniadto nga miingon nga may pagka langto ang babaye nga Koreana tungod kay mokaon man kini sa sagad nila pagkaon nga hang. Apan kun kini man ang sitwasyon, lahi si Leng.

Humot kaayo si Leng ug paraygon. “I love you. I will bring you to Korea and start making business of Habal-habal there,” nangomedya ang Koreana nga si Leng. Giparaygan pagbalik ni Efren si Leng.

“You can bring me to a much safer place you want,” matud ni Leng. Abtik kaayo ang huna-huna ni Efren nga nakasabot sa buot ipasabot sa Koreana. “Okay, let’s go,” mitindog dayon si Efren.

Giagbayan niya si Leng samtang nagpaingon sila sa giparkingan sa motorsiklo nga matag gabii gigamit sa sideline nga habal-habal. Lahi sa pagsakay ni Leng kaganina, migakus na kini kang Efren. (Sumpayan)