Ms. Ladyboy

Dear Tita Salie,

Have a wonderful day. Just call me Ladyboy, usa ka lalaki apan babaye og kasingkasing. Ang akong problema kabahin kini sa akong lovelife. Aron imong masabtan ang tanan mao kini ang nahitabo.

Nahigugma ko sa una sa sama nako usa ka lalaki. Ug nagtipon kami pagpuyo sulod sa 3 ka tuig. Malipayon kaayo, Tita, kay bisan kun ingon ako niini iya man gyud nga gipakita nga love gyud ko niya. Iya kong gimahal sa tinuoray ug mura gyud og matuod kami nga magtiayon.

Unya nagnegosyo ming duha aron usab duna kami kita matag adlaw. Tuod man wala gyud kami maglisod sa among pagpuyo. Ug malipayon gyud ko uban kaniya. Apan niabot gyud ang panahon nga akong gikahadlokan ang matental siya sa tinuod gyud nga babaye. Duna siya’y gikasakay sa jeep nga usa ka babaye namaligya og dungog ‘mubog lupad’ ug anakan pa gyud. Sakit kaayo, Tita, apan akong gidawat ang kamatuoran nga pildi gyud ko.

Karon aduna koy laing lalaki. Bisan kun iyang gipakita nako nga mahal kaayo ko niya apan anaa lang gihapon sa akong hunahuna nga mahanaw ra gihapon siya nako. Kanunay gihapon nako mahinumdoman ang nahitabo sa una nakong uyab. Unsa may angay kong buhaton, Tita? Daghang salamat and more power.

* * *

Hello Ladyboy,

Sakit gyud kaayo kun kita budhian sa tawo nga atong gisaligan. Unya kun ang maong pagsalig nga atong gihatag maguba tungod kay nadaog kini sa mga pagsulay ug tentasyon, lisod na kining pabarogon pagbalik.

Maglisod na kita pagsalig pagbalik kun kita nabiktima na. Anaa na gyud kanunay ang pagduhaduha. Tungod kay natural kini sa tawo nga atong protektahan ang atong kaugalingon nga dili masakitan. Mao kini ang gitawag og instinct. Tungod kay bililhon kanato ang atong kaugalingon dili kita mosugot nga masubli pa ang kasakit nga atong nasinati.

Ms. Ladyboy, aron dili kana masakitan sa imong mga umaabot nga relasyon, kinahanglan nga kanunay kang andam sa mga posibleng mahitabo. Nasayod kanang daan nga pildi gyud ka kun makig-kompetensiya ka sa matuod nga babaye, busa kun mosulod ka pagbalik nianang kalibotan sa gugma imo nang andamon ang imong kaugalingon nga talagsa ra gyud mahitabo ang maong klaseng relasyon sa pulos lalaki mopadayon kay siyempre, dili ka man gyud makahatag sa lalaki og katagbawan sa lawasnong panginahanglan ug dili ka usab makahatag kaniya og anak.

Busa, samtang anaa pa siya sa imong mga kamot ipakita ang imong tinuod nga gugma ug ang tanan nimong makaya, kay moabot ra ang panahon nga mahanaw ra usab siya.

-- Tita Salie