Kadtong mga pulong mo, Nay

katalirongan niya sulod sa tindahan nga gipalitan nilag pan ug softdrinks. Pulos sila mananagat.

Martial Law. Nadakpan sa mga pulis silang Emon ug mga kaubang batan-on nga

Gigutom sila. Mao nga imbes matulog na didto sa bas nga hapinan lag sakong plastik kilid sa ilang pambot, mianhi sila sa merkado aron mangitag tindahan nga abiyerto pa. Samtang sila nangaon, wala sila’y kalibotan nga mi-alas 12:00 na diay sa tungang gabii. Aw, nadakpan nuon sila sa curfew.

Nakatilaw gyo’g priso silang Emon tibuok gabii. Pagka buntag, giawotan ang tag-as nilang buhok, unya gipalimpyo sa nataran sa munisipyo una sila buhii.

“Paita gyod ning pobre ta, uy! Binuangan man lang ta sa dunay gahom. “Yawyaw-mahay sa kaugalingon ni Emon. Ug gumikan sa maong pait nga kasinatian, nahagit siya sa pagpakig-asdang batok sa kawad-on.

Mihunong siya pagkuyog sa pamarungoyan ni Ingko Meyon. Dala ang iyang hayiskol diploma nga taudtaod nang natago sa kaban ni Nanay niya Kriste, nanimpalad si Emon sa siyudad, diin walay laing gipabalon ang inahan gawas ning mosunod nga mga pulong pahimangno: “Ayaw gyod tawon pagpakasala sa balaod, Dong. Kun ugaling adto ka puyo sa atong paryente, kinsa sama nato pobre pud, ayaw gyod didto pagpasenyorito. Himoa ang tanang buluhaton sa balay aron di ka nila mabuyboyan. Ug labaw sa tanan, sangpit pirme sa Ginoo. Kay walay imposibleng butang nga dili Niya mahimong posible. Lihok taman sa ginhawa kay tabangan ka Niya.”

Mipuyo si Emon sa magahob nga dakbayan dulog kanunay ang mga bulawanong pulong sa iyang inahan. Nakasulod siya’g trabaho isip panadero sa usa ka bakery, diin magabii naghinayhinay siyag eskuyla sa kolehiyo. Hangtod nga sa walay hunong nga sakripisyo, nakagraduwar siya sa kursong Accountancy nga usa ka CUM LAUDE. Ang nakanindot, kay pagkuha niya’g board exam, mi-top pa gyod. Iyang nakuha ang ikaduhang kinatas-ang dapit.

Giregalohan siya’g bag-ong kotse sa tag-iya sa unibersidad. Giulian sa tanan niyang nagasto gikan sa pagsugod hangtod pagkahuman ni Emon sa iyang kurso. Unya giilogan pa gyod siya sa mga dagkong kompaniya, kinsa pulos mitanyag og dagkong suweldo.

Naglumba pagpangambak ang mga luha ni Emon gumikan sa nagpungasing grasya nga iyang nadawat gikan sa Ginoo. Atubangan sa lawod sa katawhan, kinsa mitambong niining selebrasiyon sa pasidungog nga gihimo sa eskuylahan alang kaniya, may gipangita siya -- ang mapinanggaon niyang inahan. Apan wala ... wala!!! Dili ug dili na niya kini makita. Kay sa miaging tuig pa kini mamatay sa sakit nga liyukemya.

Mibuhagay pagsamot ang mga lusok sa kaapingan ni Emon. Mihilak siya ug mihilak. Hangtod sa hinayhinay, naabli ang nagtibi niyang mga ngabil, diin mao ra kini ang iyang nasulti: “Kadtong mga pulong mo, Nay. Oo, kadtong mga pulong moo!!” (Kataposan)