Maunongon Ang Gugma

Gula 94

Apan nahigugma kaha usab si Jeffrey kaniya? Kini ang dili niya maseguro. Kay sa higayon nga magtagay sila sa lawasnong kalipay, wala niya madungog ang mga pulong sa paghigugma gikan sa mga ngabil niini.

“Tinuod ba kining imong gitaho kanako, Genteroy?” Mahinangpong pangutana ni Brandon Mercado sa polis.

“Tinuod lagi, Boss,” nagkanayon si SPO3 Romualdo Genteroy. “Usa ka mangangahoy ang nakadiskubre sa dapit nga nahimutangan nila ni Jeffrey Acero ug sa kauban niining babaye nga nakuhaan og impormasyon sa akong asset. Tua diay sila magtago sa gamay’ng lasang sa Tabon, usa ka bukirang barangay nga may gilay-ong 20 kilometros gikan sa kinapusoran sa lungsod sa Dalaguete.”

“Kun mao kana,” ni Brandon pa. “Adtoon dayon nato ang maong dapit. Gusto ko nga ako’y makapatay kaniya. Usa siya ka pinangita sa balaod busa wala ako’y tulobagon kun mapatay ko siya.”

Nangandam dayon ang grupo ni Brandon kinuyogan ni SPO3 Genteroy aron sulngon ang dapit nga gitagoan nila ni Jeffrey ug Danica.

Mikiros sa pagpangandam sila si Col. Vince Noot. Nakadawat sila’g report gikan sa ilang police asset mahitungod sa dapit nga gitagoan nila ni Jeffrey. Kinahanglang ang iyang grupo maoy unang makaabot sa maong dapit. -- Sumpayan pa