Naglibog gyod

Dear Tita Salie,

Have a blessed day, Tita! Please call me Lady H. I am 20 years of age and still single.

Ang akong problema mahitungod sa akong lovelife. Sa akong tan-aw morag gilisud-lisod ko sa akong kasing-kasing karon.

Duna man god koy duha ka uyab, Tita. Ang usa 27 years old na ug naa karon sa prisohan kay piniriso man siya. Ug ang lain nakong uyab manghod nako og duha ka tuig.

Mahal nako silang duha, Tita, kay mingawon man ko nila kondili nako sila makit-an. Mao nga maglibog gyod ko kun kinsa akong pilion nilang duha nga pulos man sila importante nako.

Niingon ra ba ang akong uyab nga piniriso nga hapit na siya mogawas. Ug gusto ra ba siya nga magminyo nami ni’g gawas niya. Ug mao gyod kini ang nakapalibog pag-ayo nako karon, Tita.

Palihog pasabta ko ug tabangi ko sa angay nakong buhaton. Salamat. -- Lady H.

* * *

Hello, Lady H. ug kumosta? Kasagaran ang tawo nga mahigugma mamahimong ilogical ug mawagtangan sa sakto nga rason. Maglisod na pagpili ug pagtan-aw kun unsay insakto. Ngano kaha nga ingon man kini niini -- makalibog?

Makalibog gyod kini tinuod tungod kay atong gisagol-sagol ang butang emotional ug intellectual.

Kun mahigugma ang tawo, emotional kana. Susama kanimo nahigugma sa duha ka tawo. Kun igo sa paghigugma walay problema bisan pila pa kabuok kaya natong higugmaon. Kun dunay gwapo, datu bisan kini minyo kaya natong higugmaon tungod kay ang emotion ug ang feelings lang ang atong gitan-aw.

Kun ato lang untang hunahunaon una kun ang minyo nga tawo puyde ba natong mamahimong uyab, of course it’s a big no. Bisan kun gwapo pa siya kaayo ug naibog gyod ta apan dili gyod puyde kun atong i-consider ang intellectual aspect kay minyo na man. Kun ato lang untang paapilon ang atong panghunahuna sa mga panahon nga kita mohimo og desisyon - malikayan gyod unta ang mga komplikadong sitwasyon.

Busa, before ka mopakanaog og hukom imo gyod nga timbang-timbangon, dili lang sa kasing-kasing apil gyod ang pangisip kun kinsa nilang duha ang imong tugyanan sa imong gugma. -- Tita Salie