Kamatayon sa Panumpa

Gula 60

“Mao kana, Xenia. Maong gusto na kong mobiya dinhi. Pero gusto kong kauban ko ikaw sa akong pagbiya dinhing dapita.”

Nakugang si Xenia sa ulahing gisulti ni Reno.

Naglibog si Xenia sa giluwatang mga pulong ni Reno. Wala siya makatugkad nganong gusto siyang ikuyog ni Reno sa pagpalayo niini sa Sugbo.

“Gimahal ko ikaw, Xenia,” ni Reno pa. “Gusto kong ikauban ka sa akong pagbiya sa Cebu. Mangadto ta sa dapit nga dili na makatultol nako ang mga tawong nagtinguha’g interes sa akong kinabuhi.”

“Nganong may mga tawo man nga nagtinguha’g daotan sa imong kinabuhi?” Nakapangutana si Xenia.

“Taas kaayong sugilanon kun isaysay ko pa kanimo ang tanan. Apan sultihan ko ra unya ikaw inig-abot sa tukmang panahon. Sa pagkakaron, ang mahinungdanon mao nga makapahilayo ko sa Cebu nga kauban ka.”

“Pero dili ko makahimo pagkuyog nimo, Reno.”

“Xenia, please...”

“I’m sorry, Reno. Pero walay igong kapasikaran nga mokuyog ko nimo. Wa tay relasyon.”

Wala mamugos si Reno. Apan nagbilin kini’g mga pulong sa dayon na niining gawas sa entertainment club. -- Sumpayan pa