Kamatayon sa Panumpa

Gula 11

Alang kang Xenia, lisod hikalimtan si Kendall tungod kay may escapades together man sila. Apan dili siya gustong molaom sa walay kaseguroan. Mao nga dihang wala na gayod siyay nadawat nga komunikasyon gikan kang Kendall didto sa gawas sa nasod, mihukom siyang kalimtan na ang ulitawo.

Alang kang Xenia, patay na ang mga panumpa nila ni Kendall nga kamatayon ray utlanan sa ilang pagminahalay. Gipatay ni Kendall ang ilang mga panumpa tungod lang sa sayop niining katahap sa kaligdong sa iyang pagka-babaye. Sakit kini alang kang Xenia.

Apan bisan og siya’y alkanse kun mabugto ang relasyon nila ni Kendall (kay gikatugyan na man niya ang iyang pagka-babaye ngadto niini), dili na lang niya kini igsapayan. Mas masakitan siya kun magpadayon siyang molaom sa butang nga imposible nang mahitabo.

Ang wala na pagpakig-communicate ni Kendall kang Xenia nakapalig-on sa iyang pagtuo nga wala nay interes ang ulitawo kaniya. Dili sab niya ipamugos ang iyang kaugalingon ngadto niini. Ang importante alang niya mao nga limpiyo siya’g konsensiya. Wala siya makasala sa relasyon nila ni Kendall ug kini ra ang lalaki nga nakahilabot sa iyang pagka-babaye. -- Sumpayan pa