Commission

GOLIAT: Tinuod tuod Noy nga wala aprobahi ang Truth Commission.

TEBAN: Tinood gyud na Goliat.

GOLIAT: Unsa man diay naaprobahan Noy?

TEBAN: Ang false commission.

GOLIAT: Unsa na ni oy.

* * *

Bugas

GOLIAT: Nganong naguol ka man Noy ... Pasko man ron.

TEBAN: Kinsa may dili maguol Goliat nga gisaaran ko sa akong maninoy nga hatagan ko og usa ka sakong bugas, unya miabot ang sako. Pero, walay bugas.

GOLIAT: Ngeeeeek.

MOONLIGHT ROMANCE

Ni Rosalie V.

Hinog sa punoan

Gula 18

“Salamat sa imong pagpakabana,” ni Noy Sidro pa.

Wala madugay, nananghid si Nelson kanila ni Urielle nga mopauli na siya balik ngadto sa Tuburan. Dili mahimong magdugay siya sa siyudad sa Sugbo tungod kay nagtrabaho siya sa usa ka dakong kompaniya sa siyudad sa Naga.

“Daghang salamat sa imong pagduaw,” ni Urielle sa dayong biya ni Nelson sa tambalanan.

Nagpasalamat usab si Noy Sidro ngadto sa ulitawo.

“Modalikyat lang unya ko dinhi kun makahigayon,” ni Nelson pa.

“Ikalipay namo ang imong presensiya, Dong,” ni Noy Sidro pa.

Nahinayon gayod ang pag-opera kang Nang Marciana. Samtang didto ang inahan ni Urielle sa operating room, ang dalaga midalikyat ngadto sa chapel sa ospital. Miluhod siya ug nag-ampo. Gipangayo niya sa kahitas-an nga magmalampuson unta ang operasyon nga gihimo sa doktor sa iyang inahan.

Gumikan sa kamaduloton sa pag-ampo ni Urielle, wala dayon siya makaalinggat sa pagpanaligdig sa iyang mga luha. Iya kining gipahiran og panyo human siya makapanguros.

Pagbalik niya ngadto sa gawas sa operating room, iyang naabtan si Don Emilio Arcanghel nga nakigsulti kang Noy Sidro. Kauban ni Don Emilio ang anak niini nga si Patrick nga mikidhat dayon pagkakita kaniya.

“Kumosta?” Gisugat siya ni Patrick.

“M-maayo man, Sir,” mubo niyang tubag. -- Sumpayan pa