Ang patay nga mibangon

Usa ka katingalahan nga panghitabo nga dili katuhoan sa baryo Bugasok. Dunay usa ka tigulang nga nagpangidaron og sento bayente anyos. Siya mao si Ingko Tasyo. Kini siya giila nga usa sa labing tigulang nga tawo sa ilang baryo. Daghan ang mibilib kaniya tungod sa iyang pangidaron. May mga silingan ug mao sila si Pilo ug Cardo, kining duha pulos mga palahubog nga mag-uuma sa ilang baryo.

"Bay Pilo!! grabeha og kinabuhi aning Ingko Tasyo oi!! Taas man kaayo og kinabuhi," dasun pa ni Cardo.

"Bitaw bai wala pa man gayud siya mamatay. Basin og naa na siyay anting anting bay kana bang dugay mamatay?

"Ah dili ko motoo ana oi. Unsa kaha bay kung atong adtoan sa ilang balay" ni Pilo pa nga nagtungabtungab sa usa ka basong tuba.

Busa nagsabot ang duha nga ilang adtoan ang balay ni Ingko Tasyo. Sa pag-abot nila sa balay.

"Sige bai tuktuka na ang pultahan," matud pa ni Pilo nga may kahadlok. Gibati siya og kahadlok tungod kay duna ra bay mga istorya nga ungo ang kaliwat niini.

"Mingaw man bai mura man og walay tawo," ni Cardo pa.

"Unsa kaha og atong gub-on kining pultahan, dayon atong kuhaun ang iyang anting anting," sige bai ni Cardo pa nga gibati na og kahinam.

Sa pag-abli nila sa pultahan ilang nakita si Ingko Tasyo nga naghigda sa iyang higdaanan nga banig.

"Hala bai Pilo na .... unsa ... mannnnn naaaa si Ingko Tasyo nga nagsiga man ang iyang mata "ni Cardo pa nga nagkurog sa kahadlok.

"Bai Pilo ayaw og hadlok hadlok diha!" pangitaa ang iyang anting anting" matud pa ni Cardo nga nagsud-ong sa tigulang.

"Bai Pilo dia ra ang iyang anting-anting." Ug gikuha ni Pilo ang grapa nga gisudlan niya sa anting anting. Ug sa kalit lang may nadungog sila nga tingog.

"Waaaaaaa!!! Ayaawwwww...." Ug nangahadlok silang duha.

"Dagan bai ... dagannnnn naay ungo. Ug nangahadlok sila nanagan ug dala ang grapa.

Ug nabati sa ilang mga silingan ang kasaba sa balay sa ilang Ingko Tasyo. Sa pagtan-aw sa ilang mga silingan patay na siya. Ug ang gibuhat sa ilang mga silingan nagbuhat dayon sila og lungon para sa patay nga lawas ni Ingko Tasyo.

Sa pagkagabii niana daghan kaayo ang mga tawo sa balay ni Ingko Tasyo aron sa pagbilar. Nalingaw ang mga silingan sa pagduwa sa lain-laing mga kalingawan sama sa madjong, ang uban nag tong-its, ang uban nag-inom og tuba.

Gisulod na ang patay'ng lawas ni Ingko Tasyo sa lungon. Grabe kadaghan ang mga tawo nga nitambong sa pagbilar.

Samtang sila si Cardo ug Pilo nitambong usab ug naminaw lang sa palibot niini. Ug samtang nagkalingaw ang mga tawo usa ka makalilisang ug makahadlok nga panghitabo. Kalit nga mibangon ang minatay ug nisyagit" Waaaaaa ..... tagae kooooo ninyo ug tuuuuubig uhaw kaayooooo ug iuli akong anting anting!!!!"

Sa pagkabati sa mga tawo sa maong tingog nanagan silang tanan. Ang uban nilayat sa bintana, ang uban nayatakan, daghan ang nangapiang ug nangabali sa maong hitabo ug pagkaugma mao na lang ang ilang nabalitaan nga wala na ang patay lawas ni Ingko Tasyo. Nagtuo ang mga tawo nga usa ka demonyo si Ingko Tasyo. Ug sukad sa maong hitabo wala na moduol ang mga tawo sa balay ni Ingko Tasyo. (Katapusan)